म. टा. प्रतिनिधी, नाशिक
शारीरिक आणि मानसिक क्षमता सिद्ध करीत नाशिकचे चार जण 'आयर्नमॅन-२०१९'चे मानकरी ठरले आहेत. ऑस्ट्रेलियात झालेल्या या स्पर्धेत नाशिकचे किशोर घुमरे, महेंद्र छोरिया, प्रशांत डबरी आणि डॉ. अरुण गचाले यांनी हा किताब पटकावला. जगभरातून अडीच हजार खेळाडूंनी या स्पर्धेत सहभाग नोंदवला. कठोर मेहनत आणि उच्च इच्छाशक्तीच्या जोरावर नाशिकच्या चौघांनी निर्धारित वेळेपेक्षा कमी कालावधीत स्पर्धा पूर्ण करून भारताची मान उंचावली आहे.
अतिशय खडतर व अवघड असलेली ही स्पर्धा १७ तासांमध्ये पूर्ण करायची होती. यामध्ये ३.९ किलोमीटर समुद्रात पोहणे, १८० किलोमीटर सायकलिंग आणि ४२ किलोमीटर धावणे या तीन स्पर्धांचा समावेश होता. सातपूर औद्योगिक वसाहतीतील एका कंपनीत कार्यरत असलेले किशोर घुमरे (वय ३४) यांनी १५ तास ११ मिनिटे २२ सेकंद, उद्योजक प्रशांत डबरी (वय ५६) यांनी १६ तास २० मिनिटे ३३ सेकंद, उद्योजक महेंद्र छोरिया (वय ४३) यांनी १६ तास २० मिनिटे ४१ सेकंद, तर बालरोगतज्ज्ञ डॉ. अरुण गचाले (वय ४०) यांनी १६ तास ५६ मिनिटे ९ सेकंदात ही स्पर्धा पूर्ण केली. नाशिकच्या चार स्पर्धकांनी निर्धारित वेळेपेक्षा कमी वेळेत ही स्पर्धा जिंकत नाशिकच्या शिरपेचात पुन्हा एकदा मानाचा तुरा खोवल्याने त्यांच्यावर अभिनंदनाचा वर्षाव होत आहे.
थंड पाण्यात पोहणे, तुफान वाऱ्याचा सामना करीत सायकलिंग करणे, धावतानाचे आल्हाददायक वातावरण आणि अखेरच्या क्षणी तिरंगा हाती घेऊन विजेते ठरल्याची झालेली घोषणा, हा क्षण अतिशय अभिमानास्पद असून, त्याचे वर्णन शब्दांत मांडणे कठीण असल्याचे मत चौघांनी मांडले. घुमरे, डबरी आणि छोरीया यांनी गेल्या वर्षी कोल्हापूर येथील 'हाफ आयर्नमॅन', तर डॉ. गचाले यांनी गोवा येथील 'हाफ आयर्नमॅन' स्पर्धा ऑक्टोबरमध्ये यशस्वीरीत्या पूर्ण केली होती. यापूर्वी नाशिकचे माजी पोलिस आयुक्त डॉ. रवींद्र सिंगल यांनी आयर्नमॅन किताब पटकावला होता. त्यांची प्रेरणा घेऊन या चौघांनी स्पर्धेत उतरण्याचा चंग मनाशी बांधला होता. त्याच इच्छाशक्तीच्या जोरावर हे यश प्राप्त झाले असून, काही वर्षांत नाशिक 'आयर्नमॅन सिटी' म्हणून नावारूपास येईल, असे ते म्हणाले. यापूर्वी नाशिकमधून ही स्पर्धा डॉ. रवींद्र सिंगल, अमर मियाजी, सुमेध व्हावळ, चेतन अग्निहोत्री यांनी पूर्ण केली आहे.
\Bअसा केला सराव\B
चारही विजेते आयर्नमॅन स्पर्धेत सहभागी होण्यासाठी गेल्या वर्षभरापासून सराव करीत होते. त्यांना डॉ. मुस्तफा टोपीवाला यांचे मार्गदर्शन लाभले. नियमित तीन तास, तर सुटीच्या दिवशी पाच ते सहा तास ते सराव करायचे. स्विमिंग, रनिंग आणि सायकलिंगच्या सरावाचे त्यांचे वार निश्चित असायचे. या नियोजनबद्ध सरावाचा त्यांना फायदा झाला.
ठरवलेले ध्येय पूर्ण करण्याचा दृढ निश्चय आणि स्वत:शीच दिलेली झुंज हे या स्पर्धेत कामी आले. पोहताना, धावताना आणि सायकलिंग करताना केलेला सराव पूर्णपणे आठवायचा. चिकाटी आणि प्रचंड इच्छाशक्तीच यशस्वी होण्यामागचे गमक आहे.
- महेंद्र छोरिया
नाशिकच्या चौघांनी वेळेत आयर्नमॅन स्पर्धा पूर्ण केली, ही अभिमानास्पद आणि आनंददायी बाब आहे. चौघांसोबत स्पर्धेपूर्वी माझा संवाद झाला होता. योग्य टार्गेट असलं, की चांगला रिझल्ट हमखास मिळतो. नाशिक आता 'स्पोर्टहब'कडे वाटचाल करीत असल्याचे दिसून येत आहे.
- डॉ. रवींद्र सिंगल, विशेष पोलिस महानिरीक्षक (आयर्नमॅन २०१८)