नाशिक मतदारसंघातून मोठी अपडेट; अजित पवार गटाच्या आमदाराचे मोठे वक्तव्य, महायुतीतील पुन्हा तणाव

नाशिक(शुभम बोडके) : नाशिक लोकसभा मतदारसंघात आजपासून उमेदवारी अर्ज दाखल करण्यास सुरुवात झाली आहे. मात्र महायुतीकडून अद्याप उमेदवार जाहीर झाला नाही. नाशिकची जागा शिंदेंच्या शिवसेनेकडून लढवली जाईल, असे खुद्द शिवसेना मुख्य नेते तथा राज्याचे मुख्यमंत्री एकनाथ शिंदे यांनी स्पष्ट केले आहे. तरी मंत्री छगन भुजबळांसह इतर अजित पवार राष्ट्रवादीच्या नेत्यांकडून नाशिकची जागा लढवणार अशा वल्गना सुरूच आहे. त्यामुळे आता नाशिक लोकसभेच्या जागी संदर्भात महायुतीत शिंदे यांची शिवसेना आणि अजित पवारांची राष्ट्रवादी यामध्ये रस्सीखेच सुरू असल्याचे पाहायला मिळत आहे. मात्र मंत्री छगन भुजबळ माघार घेतल्यानंतर आज अजित पवारांच्या आमदाराने एक मोठा वक्तव्य करत उमेदवारी करणार असल्याची घोषणा केली आहे.

सिन्नर विधानसभा मतदारसंघाचे आमदार माणिकराव कोकाटे यांनी एक मोठी घोषणा केली. पक्षाने सांगितले तर लोकसभा निवडणूक लढवणार, कोकाटे म्हणाले. त्यामुळे आता राष्ट्रवादीकडून उमेदवारी करण्यासाठी कोकाटे यांनी इच्छुक असल्याचे जाहीर केल्याने महायुतीतील वातावरण पुन्हा तापल्याचा पाहायला मिळत आहे. विद्यमान खासदार हेमंत गोडसे यांनी उमेदवारी संदर्भात एकनाथ शिंदे हे निर्णय घेतील आणि नाशिक लोकसभेत धनुष्यबाणावरच उमेदवार असेल, असे सांगितले. मात्र आमदार माणिकराव कोकाटे यांनी उमेदवारी करणार असल्याचे सांगितल्यामुळे काल झालेल्या राष्ट्रवादीच्या बैठकीत नाशिकची जागा राष्ट्रवादीला मिळावी यासाठी प्रयत्न सुरू असल्याचे बोलले जात आहे. त्यामुळे अर्ज दाखल करण्याची आजपासून सुरुवात झाली असली तरी मात्र महायुतीचा वाद हा मिटत नसल्याचा पाहायला मिळत आहे.
Lok Sabha Elections 2024: दुसऱ्या टप्प्यात देशात बंपर मतदान; महाराष्ट्राने पुन्हा लाज घालवली, फक्त इतके टक्के मतदान

कोकाटे यांना महायुतीने उमेदवारी दिल्यास

नाशिक लोकसभा मतदारसंघात सिन्नर विधानसभा मतदारसंघ हा सर्वाधिक महत्त्वाचा मतदार संघ म्हणून ओळखला जातो. कारण सिन्नर तालुक्यातील मतदान हे सर्वाधिक असल्याने आजपर्यंत माहितीच्या उमेदवाराच्या पारड्यात सिन्नर तालुक्याने आपला कौल दिला आहे. महाविकास आघाडी देखील ऐनवेळी सिन्नरचे माजी आमदार राजाभाऊ वाजे यांना नाशिक लोकसभेची जागा देऊन सिन्नरला खासदारकीचा मान मिळवण्याची संधी दिली असल्याचा बोलल्या जात आहे. त्यामुळे आता महायुतीकडून देखील वाजे यांच्या विरोधात तुल्यबळ उमेदवार देण्याच्या हालचाली सुरू आहेत.


कोकाटे यांचे राजकीय कट्टर विरोधक म्हणून वाजे यांना बघितले जाते. त्यामुळे शेवटच्या क्षणी महायुतीकडून वाजे यांच्या विरोधात कोकाटे यांना उमेदवारी देत महाविकास आघाडीला जबर धक्का देण्याचे देखील शक्यता वर्तवली जात आहे. मागील लोकसभा निवडणुकीत कोकाटे यांनी अपक्ष उमेदवारी करत तब्बल दीड लाख मते घेतली होती. आणि त्यामध्ये सर्वाधिक मते हे सिन्नर तालुक्याने कोकाटे यांना दिली असल्यामुळे आता कोकाटे यांच्या लोकसभा निवडणुकीच्या रिंगणात उतरल्याच्या वक्तव्यामुळे नाशिकमध्ये राजकीय वर्तुळात विविध चर्चा रंगू लागल्या आहेत. कोकाटे यांना महायुतीकडून उमेदवारी दिल्यास वाजे यांना कोकाटे निवडणुकीत आव्हान ठरतील अशी देखील चर्चा सुरू झाली आहे.