‘एमएड’संदर्भात राज्यस्तरीय मंथन

म. टा. प्रतिनिधी, नाशिक यशवंतराव चव्हाण महाराष्ट्र मुक्त विद्यापीठाच्या शिक्षणशास्त्र विद्याशाखेच्या वतीने आज, शुक्रवार (दि. ३)पासून शिक्षणशास्त्र निष्णात (एम. एड. शिक्षणक्रम) माजी विद्यार्थ्यांच्या राज्यस्तरीय चर्चासत्राचे आयोजन करण्यात आले आहे. या चर्चासत्राचा समारोप शनिवारी (दि. ४) होणार आहे.

शैक्षणिक क्षेत्रात नाविन्यपूर्ण कृतींचा प्रचार व प्रसार करणे, शालेय प्रशासन सर्वसमावेशक करण्यासाठी क्षमतांचे उत्कृष्ट विकसन करण्याच्या उद्देशाने हा उपक्रम आयोजित केला असल्याचे विद्यापीठाने सांगितले. विद्यापीठाच्या शैक्षणिक सभागृहात अायोजित केलेल्या या दोनदिवसीय चर्चासत्रात ‘मुक्त शिक्षण प्रणालीतील एम. एड. शिक्षणक्रमातून झालेला व्यावसायिक विकास’ या विषयावर चर्चा होणार आहे.

शालेय प्रशासनातील बदलत्या प्रवाहात एम. एड. शिक्षणक्रमाची उपयुक्तता, शैक्षणिक जिल्हा प्रशासनाच्या बदलत्या स्वरूपामध्ये एम. एड. संशोधनाचे उपयोजन, शालेय स्तरावर गुणवत्ता विकासासाठी एम. एड. संशोधनाचे उपयोजन, विविध स्तरांवरील शैक्षणिक प्रशिक्षणात तज्ज्ञ , सहभागी व्यक्ती म्हणून कार्य करताना एम. एड.मधील अनुभवाची उपयुक्तता, शिक्षक ते शिक्षक-प्रशिक्षक वाटचालीत एम. एड. शिक्षणक्रमाचे योगदान, विविध संस्थांद्वारे संशोधन प्रकल्प अनुदानासंदर्भात मार्गदर्शन, एकविसाव्या शतकासाठी शिक्षक-प्रशिक्षणात मुक्त विद्यापीठाच्या एम. एड. शिक्षणक्रमाचे महत्त्व, उच्च पातळीवरील संशोधनासाठी एम. एड. स्तरावरील संशोधनातून पायाभरणी, विद्यार्थ्यांना मानवी आधारासाठी अभ्यास केंद्राचे योगदान हे उपविषयही चर्चिले जाणार आहेत. या चर्चासत्राचे उद्घाटन कुलगुरू प्रा. डॉ. माणिकराव साळुंखे यांच्या हस्ते होईल. या चर्चासत्रात विद्यापीठाच्या एम. एड. शिक्षणक्रमाच्या माजी विद्यार्थ्यांनी सहभागी व्हावे, असे आवाहन शिक्षणशास्त्र विद्याशाखेच्या संचालक तथा संयोजक डॉ. संजीवनी महाले, डॉ. दयाराम पवार, प्रा. विजयकुमार पाईकराव आदींनी केले आहे.

ही आहेत प्रमुख उद्दिष्टे स्थानिक स्वराज्य संस्थेमधील शैक्षणिक कार्य परिणामकारक करण्यासाठी विविध योजना समजून घेणे, विविध संस्थांकडून संशोधन कार्यासाठी अनुदान दिले जाते त्याबाबतची माहिती मिळविणे, शालेय अभ्यासक्रम २०१२ नुसार शिक्षण प्रणालीत झालेल्या बदलानुसार कार्य करणे, एकविसाव्या शतकातील शैक्षणिक क्षेत्राचे बदलते स्वरूप समजून घेणे, उच्च पातळीवरील संशोधनासाठी एम. एड. ज्ञानाचे उपयोजन समजून घेणे ही या चर्चासत्राची प्रमुख उद्दिष्टे आहेत.