२८ ‍लाख गुंतवणूकदार; तेराशे कोटींची देणी !

म. टा. प्रतिनिधी, नाशिक मैत्रेय कंपनीद्वारे गुंतवणूकदारांची फसवणूक केल्याप्रकरणी कंपनीने कोर्टाच्या आदेशानुसार बुधवारी आर्थिक व्यवहारांचा आराखडा सादर केला. या आराखड्यानुसार मैत्रेय कंपनीचे २८ ‍लाख ३६ हजार २५० गुंतवणूकदार आहेत. कंपनीकडून त्यांना एक हजार ३३५ कोटी ७० लाख १८ हजार २३० रुपयांची देणी लागत असल्याचे स्पष्ट झाले आहे. या आराखड्याचा अभ्यास करण्यासाठी सरकारी वकिलांनी मुदत मागितली असून कोर्टाने वर्षा सत्पाळकर यांच्या जामीन अर्जावर येत्या ५ एप्रिलला सुनावणी ठेवली आहे.

सेबीने बंदी केल्यानंतरही सत्पाळकर आणि जनार्दन परुळेकर यांनी गुंतवणूकदारांकडून अब्जावधी रुपयांच्या ठेवी जमा केल्या. मात्र ठरल्याप्रमाणे गुंतवणूकदारांना आर्थिक परतावा देण्यास टाळाटाळ केल्याने दोघांविरोधात सरकारवाडा पोलिसांनी गुन्हा दाखल केला. त्यामुळे कोर्टाने सत्पाळकर यांना पोल‌िस व त्यानंतर न्यायालयीन कोठडी सुनावली. त्यानंतर त्यांना सशर्त जामीन देण्यात आला. कंपनीच्या गुंतवणूकदारांना कसा परतावा देणार याबाबतचा आराखडा देण्यास सांगितले होते. त्यानुसार सत्पाळकर यांनी बुधवारी (दि.२३) कोर्टात आराखडा सादर केला. या आराखड्यात सत्पाळकर यांनी कंपनीच्या मालमत्तेविषयी

माहिती दिली. त्यामुळे कोर्टाने ५ एप्रिलपर्यंत सुनावणी पुढे ढकलून सत्पाळकर यांनाही ५ एप्रिलपर्यंत जामीन मंजुर केला आहे.