हॅप्पी संडेची ‘हेल्दी’ सुरुवात

नाशिककरांसाठी पोलिस आयुक्तालयाकडून ‘लास्ट संडे ऑफ दि मंथ’ उपक्रमाचे आयोजन

कॉलेज क्लब रिपोर्टर

शहरातील आबालवृद्ध जॉगिंग सूट घालून रविवारी (दि. २३) सकाळी आसारामबापू पुलाजवळ गोदा पार्कवर रनिंग करताना दिसून आले. सोबतच अनेक पोलिस कर्मचारी व अधिकारीदेखील नाशिककरांसमवेत धावत होते. संडे मॉर्निंगच्या या आल्हाददायक वातावरणात नाशिककर धावणं एन्जॉय करत होते. निमित्त होते ते ‘लास्ट संडे ऑफ दि मंथ’ उपक्रमाचे. एवढ्या सकाळी जॉगिंग करत हॅप्पी संडेची हेल्दी सुरुवात झाल्याचं नाशिककर सांगतात.

नाशिक पोलिस आयुक्तालय यांच्या संकल्पनेतून नाशिक शहरात ‘लास्ट संडे ऑफ दि मंथ’ या उपक्रमाचे आयोजन करण्यात आले होते. विदेशात काही शहरात महिन्याच्या सुरुवातीस शेवटच्या रविवारी सामूहिक क्रीडा व सांस्कृतिक उपक्रम राबविले जातात. याच धर्तीवर नाशिकमध्येही ‘लास्ट संडे ऑफ दि मंथ’ (एलएसओएम) या उपक्रमाची सुरुवात रविवारी करण्यात आली.

हॅप्पी स्ट्रीट या अभिनव धर्तीवर एलएसओएम हा उपक्रम घेण्यात आला. सकाळी ६.३० वाजता दहा किमी जॉगिंगची सुरुवात नाशिक पोलिस आयुक्त डॉ. रवींद्र सिंघल व उपायुक्त विजय पाटील यांनी ध्वज फडकवून केली. यावेळी ‘लास्ट संडे ऑफ दि मंथ’ च्या फलकाचेही अनावरण करण्यात आले. येत्या काळात ‘एलएसओएम’ शहरात अनेक ठिकाणी राबविला जाणार असून त्याचे स्वरूप, जागा यात बदल केला जाईल. हा उपक्रम नागरिक व पोलिस यांच्या एकत्रित उत्साहासाठी असेल, असेही सिंघल यावेळी म्हणाले.

यानंतर नाशिककरांसमवेत पोलिस आयुक्त, उपायुक्त, सहाय्यक उपायुक्त तसेच अनेक पोलिस अधिकारी व कर्मचारी यांनी जॉगिंग एन्जॉय केली. मोठ्या संख्येने नाशिककर या उपक्रमात सहभागी झाले होते. लहानग्यांपासून तर वृद्धांपर्यंत सर्वांनी यावेळी ‘स्टे फिट’ म्हणत धावण्याचा आनंद घेतला. जॉगिंग नंतर स्ट्रेचिंग करत सायकलिंग करण्यासाठी मोठ्या प्रमाणावर सायकलिस्ट सहभागी झाले होते. नाशिककरांना पोलिस आयुक्तालयातर्फे अल्पोपाहार यावेळी देण्यात आला.