अजगरच्या मृत्यूनंतर कैद्यांमध्ये असंतोष

नाशिक: नाशिकरोड मध्यवर्ती कारागृहात अजगर अली मुमताज मन्सुरी या कैद्याने आत्महत्या केल्याची धक्कादायक बाब उजेडात आली आणि प्रशासन विरोधात कैदी असा वाद उभा राहिला आहे. या वादात इतर बंदींनी उडी घेतली असून, या प्रकरणी थेट हायकोर्टात तक्रार दाखल करण्याच्या हालचाली सुरू झाल्या आहेत. मन्सुरीला आत्महत्या करण्यास प्रवृत्त केल्याप्रकरणी कैद्यांनी 'मटा'स पत्र दिले असून, त्यात वेगवेगळे दावे करण्यात आले आहेत.

सेंट्रल जेलमध्ये कैद्याचा मृत्यू होणे ही नवीन बाब नाही. बऱ्याचदा चार भींतीतील मृत्यूची ओरड बाहेरपर्यंत पडतच नाही. यावेळी अजगरच्या निमित्ताने आरोप प्रत्यारोपांचे सत्र सुरू झाले आहे. अजगरने आत्महत्या करण्यापूर्वी प्लास्टिकच्या पिशवीत सुसाईड नोट टाकून ती गिळून घेतली होती. यानंतर ७ ऑक्टोबरला त्याने बॅरेकमध्ये मास्कच्या दोरीने आत्महत्या केली. सुसाईड नोटबद्दल वा त्यातील मजकुराबाबत दावे प्रतिदावे असले तरी पोलिस याबाबत स्पष्ट बोलण्यास राजी नाहीत. मात्र जेलमधील कैद्यांकडून एकाच अधिकाऱ्याचे आणि त्याच्या सहकाऱ्यांचे नाव घेतले जाते आहे हे विशेष! मयत अजगरच्या नातेवाइकांनी या प्रकरणी नाशिकरोड पोलिस ठाणे गाठून फिर्याद देण्याचा प्रयत्न केला. मात्र, आकस्मात मृत्यू असून, चौकशीअंतीच हा निर्णय घेतला जाईल, असे पोलिसांनी स्पष्ट करीत या नातेवाइकांना मुंबईची वाट दाखवली. सुशांतसिंग राजपूतच्या आत्महत्येनंतर तपासाबाबत पोलिसांनी ताकही फुकूंन पिण्याची भूमिका घेतली आहे. दरम्यान, जेलमधीलच एका कैद्याने या प्रकरणी हायकोर्टात याचिका दाखल करण्याची तयारी सुरू केली आहे. तर, दुसरीकडे किमान सहा कैद्यांनी एक पत्र 'मटा' कार्यालयास पाठवले आहे.

अजगर अत्याचाराचा बळी?

अजगर हा १५ वर्षांपासून जेलमध्ये होता. तो नो सेप्रेट दोन या विभागाचा वॉर्डन म्हणून काम पाहत होता. जेलमध्ये सुरू असलेल्या काही अपप्रकारांची माहिती तो वरिष्ठांना पुरवतो, असा संशय बळावल्याने त्याचा मानसिक छळ सुरू झाला. जेल प्रशासन अजगरच्या पारिवारिक चिंताचे कारण पुढे करीत असले तरी त्याचा विवाहच झाला नव्हता. हसतमुख असलेला अजगर जेल अधिकारी प्रदीप बाविस्कर यांच्या अत्याचारांचा बळी ठरल्याचा आरोप कैद्याकडून करण्यात आला आहे.

समितीकडून चौकशी

या प्रकरणी तुरूंग प्रशासनाने तीन सदस्यीय समितीकडून चौकशी सुरू केल्याची माहिती पुढे येत आहे. अजगरने आत्महत्या केली त्याच्या चार ते पाच दिवसांपूर्वी त्याच्याकडील वॉर्डन पद काढून घेण्यात आले. या प्रकरणी ६ ऑक्टोबर रोजी त्याने तुरूंग अधीक्षक प्रमोद वाघ यांच्याकडे कैफीयत सुद्धा मांडली. मात्र, काही कारवाई होण्याआगोदरच त्याने आत्महत्येचा मार्ग निवडला.