VIDEO : महिला शिवसैनिकांनी शिंदे गटाच्या कार्यकर्त्यांना भर रस्त्यात दिला चोप; हातवारे केल्याचा आरोप

नाशिक : शिवसेनेतील ऐतिहासिक फुटीनंतर मुंबईत होत असलेल्या दोन दसरा मेळाव्यांच्या पार्श्वभूमीवर राजकीय वातावरण चांगलंच तापलं आहे. अशातच शहापूरजवळ शिवसेना नाशिक शहर महिला आघाडीच्या कार्यकर्त्यांनी शिंदे गटाच्या कार्यकर्त्यांना भर रस्त्यात चोप दिल्याची घटना घडली आहे. शिंदे गटाच्या कार्यकर्त्यांनी ट्रॅव्हल्स बसमध्ये बसलेल्या शिवसेनेच्या महिला कार्यकर्त्यांकडे बघून हातवारे केल्याच्या आरोपातून ही मारहाण करण्यात आल्याची माहिती आहे.

शिवसेनेच्या महिला पदाधिकाऱ्यांनी गाडी थांबवून शिंदे गटाच्या कार्यकर्त्यांना वाहनातून उतरवले आणि मारहाण केली. शहापूर शहराजवळ ही घटना घडली आहे. मारहाण झालेले शिंदे समर्थक हे अहमदनगर जिल्ह्यातील असल्याची शक्यता आहे.



दरम्यान, या मारहाण प्रकरणानंतर शहापूर परिसरात काही काळ तणाव निर्माण झाला होता.

ताई मुख्यमंत्री झाल्याच पाहिजेत! कार्यकर्त्याची घोषणा; पंकजा म्हणाल्या, ये लाल फेटेवाल्या गप बस्स!

नाशिक जिल्ह्यातून मेळाव्यासाठी कुमक

बुधवारी मुंबईच्या बीकेसी मैदानावर होणाऱ्या मुख्यमंत्री एकनाथ शिंदे गटाच्या शिवसेना मेळाव्याला नांदगांव विधानसभा मतदार संघातून सुमारे १० ते १२ हजार कार्यकर्ते उपस्थित राहणार असल्याची माहिती शिंदे समर्थक आमदार सुहास कांदे यांनी काल माध्यमांशी बोलताना दिली होती. शिवतीर्थावर होणाऱ्या उद्धव ठाकरे यांच्या सभेच्या पार्श्वभूमीवर शिंदे गटानेही बीकेसी मैदानातील मेळावा यशस्वी होण्यासाठी जोरदार शक्ती प्रदर्शनाची तयारी सुरू केली आहे. नांदगांवहून कार्यकर्ते नेण्यासाठी १०० बस जाणार आहेत. त्यासाठी राज्य परिवहन मंडळाकडे १०० बसेसची मागणी केल्याचे कांदे यांनी सांगितले. या शिवाय पदाधिकाऱ्यांची १०० वैयक्तिक वाहनेही मुंबईला नांदगावहून रवाना होणार असल्याचे ते म्हणाले.