त्र्यंबकेश्वर मंदिराच्या गर्भगृहात अखेर महिलांचा प्रवेश

मटा ऑनलाइन वृत्त । नाशिक

त्र्यंबकेश्वर येथील शिवमंदिराच्या गाभाऱ्यात अखेर आज पुण्यातील स्वराज संघटनेच्या महिला कार्यकर्त्यांना प्रवेश देण्यात आला आहे. सकाळी ६ वाजून ५ मिनिटांनी कडेकोट पोलीस बंदोबस्तात तीन महिलांनी गाभाऱ्यात जाऊन पूजा केली. त्यामुळे शनिशिंगणापूरनंतर त्र्यंबकेश्वर मंदिरातील प्रवेशासाठी महिलांनी पुकारलेल्या लढ्याला यश आलं आहे.

स्वराज संघटनेच्या अध्यक्षा वनिता गुट्टे यांच्यासह सात महिलांनी शिवमंदिराच्या गाभाऱ्यात प्रवेश केला. त्यापैकी तीन महिलांनी गाभाऱ्यातील पिंडीवर नतमस्तक होत पूजा केली. गाभाऱ्यात यावेळी पोलीसही तैनात होते. याआधी या संघटनेच्या कार्यकर्त्यांनी तीन वेळा मंदिराच्या गाभाऱ्यात प्रवेश करण्याचा प्रयत्न केला होता मात्र प्रचंड विरोधामुळे हे प्रयत्न फसले होते. बुधवारी तर स्वराज संघटनेच्या कार्यकर्त्यांना मंदिराच्या आवारात मारहाणही करण्यात आली होती. त्यात एक महिला बेशुद्धही पडली होती. याप्रकरणी स्वराज संघटनेच्या तक्रारीवरून त्र्यंबकेश्वरच्या मंदिर न्यासाच्या चार विश्वस्तांसह १५० ग्रामस्थांवर गुन्हे दाखल करण्यात आले आहेत. या पार्श्वभूमीवर आज पोलिसांनी कडेकोट बंदोबस्त ठेऊन महिलांच्या मंदिर प्रवेशाचा मार्ग सुकर केला.

दरम्यान, मंदिरांमध्ये महिला-पुरुष भेदभाव मान्य नाही, अशी राज्य सरकारने घेतलेली भूमिका आणि हायकोर्टाचे निर्देश यांमुळे महिलांसाठी महाराष्ट्रात ज्या मंदिरांची दारे बंद होती ती खुली झाली. सर्वप्रथम शनिशिंगणापूर येथील शनिचौथऱ्यावर महिलांना प्रवेश मिळाला. त्यानंतर आता त्र्यंबकेश्वर येथेही महिलांना मंदिराच्या गर्भगृहात प्रवेश मिळाल्याने महिलांच्या लढ्याला मोठं यश मिळाल्याचं दिसत आहे.

ही ऐतिहासिक घटना

त्र्यंबकेश्वर मंदिराच्या गाभाऱ्यात प्रथमच महिलांना प्रवेश मिळाला आहे. आजचा दिवस ऐतिहासिक आहे. तीन दिवस सतत केलेल्या संघर्षाला आज यश आलं आहे. संघर्षाचं चांगलं फळ तमाम शिवभक्त महिलांना मिळालं आहे, अशा शब्दांत वनिता गुट्टे यांनी आनंद व्यक्त केला.

आज त्र्यंबकेश्वर बंद

ग्रामस्थांवर गुन्हे दाखल केल्याप्रकरणी पोलिसांचा निषेध करण्यासाठी आज त्र्यंबकेश्वर बंद पुकारण्यात आला आहे. मंदिरात चाललेल्या या संपूर्ण प्रकाराबाबत नित्य दर्शनास येणाऱ्या महिला भाविकांमध्ये नाराजी आहे. आज अनेक महिला मंदिरात गेल्या नाहीत. त्यामुळे हा तणाव लगेचच निवळेल अशी शक्यता नाही.

न्यायालयाने दिलेल्या निर्देशांचं पालन करण्यासाठी मंदिराच्या गाभाऱ्यात प्रवेश करणाऱ्या महिलांना संरक्षण देण्यात आलं - प्रशांत मोहिते, अप्पर पोलीस अधीक्षक