…म. टा. प्रतिनिधी, नाशिक
वैनतेय गिर्यारोहण संस्थेच्या सात सदस्यांनी ६ सप्टेंबरच्या रात्री लेहजवळील मार्खा व्हॅलीतील माउंट कांग यात्से-२ हे २१ हजार फूट उंचीचे शिखर सर केले.
मोहिमेचे नेतृत्व नाशिकरोडच्या डॉ. सुनील वर्तक यांनी केले. वैनतेयच्या या संघात १३ गिर्यारोहक होते. त्यातील डॉ. वर्तक, डॉ. शरद पाटील, शाम चौधरी, बापू घोडके, डॉ. रवींद्र शिवदे, अमोल सावरकर, नलेश नाहटा हे गिर्यारोहक नाशिकमधून, डॉ. अमोल तांबे, कात्या तांबे, तन्वी तांबे, संदीप शेवाळकर हे इंग्लंडमधून, डॉ. गणेश चव्हाण परभणीहून तर दिनेश ओसवाल हे बारामतीहून सहभागी झाले होते. यातील डॉ. पाटील, घोडके, शिवदे, नाहटा यांनी शिखर सर करण्याचा प्रयत्न केला, परंतु खराब हवामानामुळे त्यांना माघारी फिरावे लागले. डॉ. चव्हाण व डॉ. ओसवाल यांनी बेस कॅम्पपर्यंत मजल मारली.
या मोहिमेमुळे नाशिकच्या शिरपेचात आणखी एक मानाचा तुरा खोवला आहे. या अगोदर महाजन बंधूंनी एव्हरेस्टची मोहीम फत्ते केल्यानंतर नाशिककरांसाठी ही दुसरी महत्त्वाची मोहीम होती. वैनतेय गिर्यारोहण गिरीभ्रमण संस्थेतर्फे टीमचे अभिनंदन करण्यात आले. मोहिमेची माहिती देण्यासाठी संस्थेकडून खास कार्यक्रम आयोजित करण्यात येणार आहे. शिखरावरून पाकव्याप्त काश्मीरमधील के २, नंगा पर्वत, गाशेरब्रम आदी शिखरांचे दर्शन झाल्याचे डॉ. वर्तक यांनी सांगितले. ही मोहीम अत्यंत अवघड होती. वातावरणात सातत्याने बदल होत होते. उलटे वारे व उणे तापमान यामुळे परिस्थितीशी जुळवून घेताना त्रास झाल्याचेही वर्तक म्हणाले.
बर्फाच्या खड्या भिंती
माउंट कांग यात्सेचा बेस कॅम्प ५ हजार ८० मीटरवर होता. ६ सप्टेंबरच्या रात्री १० वाजता बेस कॅम्पहून शिखर मोहिमेसाठी निघालेली टीम खड्या हिमभिंतीवरून कठीण परिस्थितीत खडतर मेहनत करून दुसऱ्या दिवशी सकाळी ८ वाजता ६ हजार ४५० मीटर उंचीच्या शिखरावर पोहोचली. तिथून पुन्हा बेस कॅम्प गाठायला दुपारचे तीन वाजले होते. वर गेलेल्या १३ जणांच्या टीमपैकी ७ जणांनी माउंट कांग यात्से मोहिमेचे हे आव्हान लीलया पेलत शिखरावर पाऊल रोवले.
आतापर्यंत १७ ते १८ मोहिमा आम्ही पूर्ण केल्या आहेत. ही मोहीम अत्यंत खडतर होती. या वातावरणाशी जुळवून घेण्यासाठी अगोदर काही मोहिमांचे आयोजन करण्यात आले होते. आमच्या संघाने ही मोहीम पूर्ण केली, याचा अभिमान आहे.
- डॉ. शरद पाटील, गिर्यारोहक