नाशिकच्या जयेशला फेसबुककडून बक्षीस

पोस्टच्या सोल्यूशनमुळेे साडेसहा लाखांचे इनाम

कॉलेज क्लब रिपोर्टर

तुम्ही फेसबुकवर टाकलेली एखादी पोस्ट किंवा फोटो कुणी अनोळखी व्यक्तीने डिलीट केला तर? होय असे जर घडले तर तुम्ही नक्कीच चिंतातूर व्हाल. पण आता या प्रश्नावर तोडगा निघाला असून लवकरच नव्या बदलांसह फेसबुक नवीन अपडेटही आणणार आहे. या अपडेटला कारण ठरला आहे ते नाशिकचा जयेश बापू अहिरे. फेसबुकवर दुसऱ्याची पोस्ट डिलीट किंवा एडिट करता येते हे जयेशनं फेसबुकला पटवून देत त्यावर उपायही सुचवला. यानुसार आता अन्य कुणालाही आपली फेसबुकवरील पोस्ट किंवा फोटो डिलीट करता येणार नाही.

सोशल मीडियाची व्याप्ती व वापर दिवसेंदिवस वाढत असून, नेट सिक्युरिटी हा महत्त्वाचा मुद्दा बनला आहे. याच नेट सिक्युरिटीवर टेस्टिंग करत असताना नाशिकच्या जयेश बापू अहिरे याने फेसबुकमधील त्रुटी शोधून काढल्या. त्याच्या या कामगिरीसाठी फेसबुककडून त्याला दहा हजार डॉलर म्हणजे तब्बल साडेसहा लाख रूपयांचे बक्षिस मिळाले. जयेशवर सर्व स्तरातून कौतुकाचा वर्षाव होत आहे. फेसबुकसह अनेक सोशल साइटमध्ये आढळणाऱ्या त्रुटींमुळे युझरचा डाटा असुरक्षित होण्याची भीती असते. याच विषयावर जयेश एकेदिवशी टेस्टिंग करत असताना त्याला ही त्रुटी आढळून आली. आपण फेसबुकवर अपलोड केलेली पोस्ट किंवा फोटो आपली परवानगी न घेता एडिट किंवा डिलीट करता येतो ही बाब जयेशने फेसबुकला इमेलद्वारे कळवली. पण यावर फेसबुककडून त्याला कसलाही प्रतिसाद मिळाला नाही. यानंतर जयेशने टेस्टिंग अकाऊंटची पोस्ट बदलून त्याचा व्हिडीओ शूट करून फेसबुकला पाठवला. यावर फेसबुकने जयेशकडून सोल्यूशन मागवून पुन्हा टेस्टिंग केल्यावर कुठलाही प्रॉब्लेम आला नाही व फेसबुकला त्याच्यावर विश्वास बसला. यानंतर त्याला फेसबुकने साडे सहा लाखांचे बक्षिस देण्याचा इमेल पाठवला व काही दिवसांपूर्वीच त्याच्या बँक अकाऊंटमध्ये बक्षिसाची रक्कम जमादेखील झाली आहे.

प्रतिकूल परिस्थितीवर मात

जयेश नाशिकच्या डिजीपीनगरमध्ये राहत असून, सध्या तो पुण्यातील कॉलेजमध्ये कम्प्यूटर इंजिनीअरिंगचे शिक्षण घेत आहे. त्याचे वडिल एका कंपनीत काम करतात तर आई शिवणकाम करून घराला हातभार लावते. जयेशच्या या अनोख्या कामगिरीचे सर्वत्र कौतुक होत आहे.

पूर्वी कुणीही कुणाची पोस्ट डिलीट व एडिट करू शकत होते. आता मात्र नवीन अपडेटनंतर हे करता येणार नाही. बक्षिस मिळाल्याचा आनंद आहे पण हे सगळं आई-वडिलांशिवाय शक्य नव्हते.

- जयेश अहिरे