इंधन दरवाढीचा राष्ट्रवादीकडून निषेध

मालेगाव : केंद्र सरकारकडून सुरू असलेल्या इंधन दरवाढीचा येथील राष्ट्रवादी काँग्रेसच्यावतीने गुरुवारी (दि २) तीव्र निषेध व्यक्त करण्यात आला. यावेळी बोलताना तालुकाध्यक्ष संदीप पवार म्हणाले की, जगात सर्वत्र इंधनाचे दर कमी होत असताना देशातील भाजप सरकार मात्र इंधन दरवाढ करून सर्वसामान्य नागरिकांच्या खिशावर डल्ला मारत आहे.

करोना काळात सर्वसामान्य नागरिक मेटाकुटीला आले आहेत. अशा परिस्थितीत नागरिकांना दिलासा देण्‍याऐवजी सरकार इंधन दरवाढ करण्यात धन्यता मानत आहे. इंधन दरवाढीमुळे महागाई वाढलेली आहे. सरकारने इंधनदर वाढ मागे घ्यावी, महागाई कमी करावी अन्यथा मालेगाव तालुका राष्ट्रवादी काँग्रेस पक्ष रत्यावर उतरून आंदोलन करेल अशा इशारा दिला आहे. मागण्यांचे निवेदन अप्पर जिल्हाधिकारी यांना देण्यात आले. यावेळी राष्ट्रवादीचे दिनेश ठाकरे, विनोद चव्हाण, विजय पवार, सलीम रिझवी उपस्थित होते.