आपले सरकार केंद्र परवानगीची चौकशी करा

सीएससी सेंटरचालकांची मागणी

म. टा. प्रतिनिधी, नाशिक

शहरात ८३ आपले सरकार सेवा केंद्र सुरू करण्यात आले असून, त्यांना कोणत्या निकषांच्या आधारे परवानगी देण्यात आली याची चौकशी करावी, अशी मागणी सीएससी सेंटरचालकांकडून करण्यात आली आहे. उपजिल्हाधिकारी डॉ. शशिकांत मंगरूळे यांना सोमवारी याबाबतचे निवेदन देण्यात आले आहे.

निवेदनात म्हटले आहे, की सेतू कार्यालय होते, अशा ८३ जणांनाच आपले सेवा केंद्रांचे वाटप करण्यात आले आहे. महाऑनलाइनच्या जिल्हा व्यवस्थापकांना याबाबत विचारणा केली असता संबंधित केंद्रचालकांनी टार्गेट पूर्ण केल्याने त्यांनाच आपले सरकारचे केंद्र देण्यात आल्याचे सांगितले जाते. याप्रश्‍नी सीएससीचे जिल्हा व्यवस्थापक महेश देशमुख यांच्याकडे संबंधितांनी विचारणा केली. परंतु, ते उडवाउडवीची उत्तरे देत असल्याचा आरोप निवेदनाद्वारे करण्यात आला आहे. आपले सरकार केंद्रासाठी अर्ज केला असता, हेल्थ होमिओचे प्रत्येकी ९९९ रुपयांचे पाच सदस्य करण्यास सांगितले जाते. प्रत्येकी ११०० रुपयांचे पाच एम्बाईब सर्व्हीस रजिस्टर, पाचशे रुपयांचे पाच सीएससी बचत खाते तसेच डीजीमित्र सोसायटीची सदस्य होण्याची अट घातली जात आहे. टार्गेट पूर्ण करतानाच तुमचे व्यवहार वाढवा असा दबावही आणला जात असल्याचे निवेदनात म्हटले आहे. त्यामुळे यासर्व प्रकाराच्या चौकशीची मागणी शमसाद पठाण, अनिल गोसावी, दीपक गोसावी, नीलेश शिरोडे, राम लांबे, भूषण वाघ, प्रशांत कमळेकर आदींनी केली आहे.