मोरे हत्याप्रकरणी सहा संशयित ताब्यात

म. टा. वृत्तसेवा, पंचवटी
अखिल भारतीय सेनेचा शहराध्यक्ष निखिल उर्फ बाला रामचंद्र मोरे या तरुणाची दिंडोरी रोडवर गुरुवारी (दि. १८) रोजी रात्री दहाच्या सुमारास गोळ्या झाडून आणि तलवारीने वार करून हत्या करण्यात आली. या प्रकरणी म्हसरुळ पोलिसांनी सहा संशयितांना ताब्यात घेतले आहे.
मोरे खूनप्रकरणी तपास सुरू असून अद्याप कुणाला अटक करण्यात आली नाही. या प्रकरणातील संशयीतांपैकी राकेश शिंदे व आरिफ कुरेशी या दोन मुख्य संशयितांसह आणखी चार जणांना ताब्यात घेण्यात आले आहे. पेठरोड येथील सप्तरंग सोसायटीत राहणारा निखिल मोरे (२६) हा रात्री दहाच्या सुमारास दिंडोरीरोडवरील बालाजी चौकातून जात होता. त्यावेळी त्याला आठ तरुणांच्या टोळक्याने अडविले. त्याच्यावर बंदुकीतून पाच गोळ्या झाडल्या. तसेच त्याच्या मानेवर तलवारीने वार केले. या हल्ल्याने जखमी झालेला निखिल रक्ताच्या थारोळ्यात कोसळला. घटनेनंतर हल्लेखोरांनी पळ काढला. त्याला तातडीने सिव्हिल हॉस्पिटलमध्ये दाखल करण्यात आले. डॉक्टरांनी त्याला मृत म्हणून घोषित केले. निखिल सोबत असलेले सूरज खाडे व अमोल निकम हे दोघे जखमी झाले.
निखिल हा अखिल भारतीय सेनेचा अध्यक्ष होता. सराईत गुन्हेगार व सध्या खुनाच्या गुन्ह्यात मध्यवर्ती कारागृहात शिक्षा भोगत असलेल्या व्यंकटेश मोरे याचा चुलत भाऊ होता. जुन्या भांडणाच्या कुरापतीतून हा खून झाला असावा, असा पोलिसांचा अंदाज आहे.