सायरन, हॉर्नही नका वाजवू!

ध्वनी प्रदूषण रोखण्यासाठी शहर पोलिसांची नवी पॉलिसी

arvind.jadhav@timesgroup.com

नाशिक : शहरवासीयांसाठी घातक ठरू पाहणाऱ्या ध्वनी प्रदूषणाचे प्रमाण कमी करण्यासाठी आपणच दंडक घालून घेण्याचा निर्णय नवनियुक्त पोलिस आयुक्त रवींद्र सिंघल यांनी घेतला आहे. ध्वनी प्रदूषण रोखण्यासाठी पोलिसांच्या सर्वच चारचाकींवरील वाहनचालकांनी सायरन तर काय पण हॉर्नही वाजू नये, असे स्पष्ट आदेश सिंघल यांनी दिले आहेत. ध्वनी प्रदूषण रोखण्यासाठी आपण प्रयत्न केले, तर डिजेमुक्त गणेशोत्सव साजरा करणे शक्य असल्याचा विश्वास आयुक्त सिंघल यांनी अधिकाऱ्यांच्या बैठकीत व्यक्त केला.

गुन्हेगारीसोबत वाहतूक आणि ध्वनी प्रदूषण कमी करण्यास प्राधन्य देणार असल्याचे स्पष्ट करीत पोलिस आयुक्त सिंघल यांनी आपले काम सुरू केले आहे. या पार्श्वभूमीवर नुकतीच त्यांनी सर्व वरिष्ठ पोलिस अधिकाऱ्यांसोबत बैठक घेतली. डिजेमुक्त सार्वजनिक गणेशोत्सव ही संकल्पना प्रत्यक्षात येण्यासाठी सर्वतोपरी उपाययोजना राबवाव्यात, असे सिंघल यांनी स्पष्ट केले. ध्वनी प्रदूषणाची पातळी कमी व्हावी, यासाठी सर्वच पोलिस वाहनांवरील सायरन तसेच हॉर्न वाजवण्याचे प्रमाण शुन्यापर्यंत यावे, असे आदेशही त्यांनी दिले.

ध्वनी प्रदूषण कमी करण्यासाठी कोर्टाने यापूर्वीच आदेश दिले आहेत. त्याची अंमलबजावणी करण्याचे कामदेखील सुरू आहे. ध्वनी प्रदूषण वाढल्याचे अनेक दुष्परिणाम मानवी जीवनावर होतात. ध्वनी प्रदूषणाची पातळी वाढविण्यासाठी डिजे कारणीभूत ठरतात. डिजेचा सर्वाधिक वापर सार्वजनिक गणेशोत्सव मंडळांकडून होतो. या कालावधीत ध्वनी प्रदूषणाची पातळी वाढते. त्यामुळे डिजेमुक्त गणेशोत्सव साजर व्हावा, यासाठी पोलिस प्रयत्नशील आहे. त्याचाच एक भाग म्हणून पोलिसांच्या चारचाकी वाहनांवरील हॉर्न, तसेच सायरन यांचा वापर शक्यतो करूच नाही किंवा केला तर फारच जुजबी असावा, असे धोरणच पोलिस आयुक्त सिंघल यांनी राबवले असल्याचे सहायक पोलिस आयुक्त सचिन गोरे यांनी स्पष्ट केले.

नो हॉर्न पॉलिसी ही नवी संकल्पना असून, याचा निश्चितच फायदा होईल. यामुळे ध्वनी प्रदूषणाची पातळी फार घटेल असे नाही. मात्र, ही एका प्रयत्नाची सुरुवात असून, त्यात शहरवासीयांनी सहभागी व्हावे.

- सचिन गोरे, सहायक पोलिस आयुक्त