म. टा. खास प्रतिनिधी, नाशिक
जिल्ह्यात कोठेही अवैध धंदे सुरू असल्यास त्या भागातील प्रभारी पोलिस अधिकारी आणि बीट अंमलदार यांना लागलीच नियंत्रण कक्षात पाठविण्याचा निर्णय जिल्ह्याचे पोलिस अधीक्षक संजय दराडे यांनी घेतला आहे. एकीकडे अवैध धंद्यांविरोधात कारवाई होत असताना, दुसरीकडे काही पोलिसच अवैध धंद्यांना प्रोत्साहन देत असल्याने दराडे यांनी हा निर्णय घेतला आहे.
पोलिस अधीक्षक संजय दराडे, अप्पर पोलिस अधीक्षक नीलोत्पल यांच्या मार्गदर्शनाखाली जिल्ह्यातील आठ उपविभागीय पोलिस अधिकारी, स्थानिक गुन्हे शाखेचे पोलिस निरीक्षक अशोक करपे यांचे पथक, तसेच सर्व पोलिस स्टेशनचे अधिकारी यांची अवैध धंदे चालविणाऱ्यांवर धडक कारवाई सुरू आहे. जिल्ह्यातील अवैध धंद्यांचे समूळ उच्चाटन करण्यासाठी आगामी काळात ही मोहीम तीव्र करण्यात येणार आहे. जिल्ह्यातील कोणत्याही पोलिस स्टेशन हद्दीतून अवैध धंदे सुरू असल्याची तक्रार आल्यास संबंधित प्रभारी अधिकाऱ्यांना जबाबदार धरून खुलासे मागवण्यात येत आहेत. अवैध धंदे आढळल्यास संबंधित प्रभारी अधिकारी व बीट अंमलदारांची तत्काळ नियंत्रण कक्ष, मुख्यालयात बदली करण्यात येणार आहे. जिल्ह्यातील दुर्गम भागात विशेष मोहीम सुरू झाल्यापासून पोलिस स्टेशननिहाय अवैध धंद्यांवर सातत्याने कारवाई करण्यात येत आहे. यात मद्यविक्री व वाहतूक करणारे, तसेच हातभट्टीची गावठी दारू तयार करणाऱ्या एकूण ५६० संशयितांवर दारूबंदी कायद्यान्वये कारवाई करण्यात आली आहे. या कारवाईत सुमारे ३१ लाख ३८ हजार ७०३ रुपयांचा अवैध मद्यासाठा, हातभट्टी, गावठी दारू व साहित्य साधने जप्त करण्यात आली आहेत. विशेषत: जिल्ह्यातील घोटी, इगतपुरी, वाडिवऱ्हे, त्र्यंबकेश्वर, कळवण, अभोणा, हरसूल, देवळा व मालेगाव तालुक्यासह इतर ठिकाणी अवैधरीत्या सुरू असलेले गावठी दारू हातभट्टीचे अड्डे उद्ध्वस्त करण्यात आले. मुंबई जुगारबंदी कायद्यानुसार एकूण १०८ केसेस करण्यात आल्या. याद्वारे सुमारे १५० जुगारींना अटक करण्यात आली. जुगाराचे साहित्य साधने व रोख रक्कम असा एकूण ११ लाख ३७ हजार ९०९ रुपयांचा मुद्देमाल हस्तगत करण्यात आला आहे.
या ठिकाणी करा तक्रार
जिल्ह्यातील अवैध धंद्यांबाबत तक्रार करण्यासाठी पोलिस अधीक्षक दराडे यांनी व्हॉट्सअॅप क्रमांक उपलब्ध करून दिला आहे. आपल्या भागात अवैध व्यवसाय सुरू असल्यास नागरिकांनी ९१६८५५११०० या व्हॉट्सअॅप क्रमांकावर किंवा नियंत्रण कक्षाच्या ०२५३-२३०९७१५ किंवा स्थानिक गुन्हे शाखेच्या ०२५३- २३०९७१० या ठिकाणी संपर्क साधावा, असे आवाहन केले आहे.