वैद्यकीय अधीक्षकांची चौकशी

रजेसाठी नियमबाह्य वैद्यकीय प्रमाणपत्र दिल्याची तक्रार

म. टा. वृत्तसेवा, मालेगाव

तालुक्यातील रावळगाव येथील ग्रामसेवकास जे. जे. रुग्णालयाच्या वैद्यकीय मंडळाची परवानगी न घेता रजा मंजुरीसाठी वैद्यकीय प्रमाणपत्र दिल्याच्या तक्रारीवरून येथील वैद्यकीय अधीक्षक डॉ. किशोर डांगे यांच्या चौकशीचे आदेश देण्यात आले आहेत. देवराज गरुड यांनी यासंबंधी आरोग्य उपसंचालक तसेच जे. जे. रुग्णालय वैद्यकीय मंडळाकडे तक्रार केली होती.

रावळगाव येथील ग्रामसेवकास गंभीर आजारामुळे चार महिन्यांची रजा मंजूर करण्यात आली आहे. मात्र यासाठी देण्यात आलेले वैद्यकीय प्रमाणपत्र नियमबाह्य असल्याची तक्रार गरुड यांनी केली होती. शासकीय कर्मचाऱ्यास गंभीर आजाराबाबत दोन महिन्यांची रजा गटविकास अधिकारी देऊ शकतात. मात्र त्याहून अधिकची रजा आवश्यक असल्यास त्यासाठी संबंधितास मुंबई येथील जे. जे. रुग्णालयातील वैद्यक मंडळाकडून तपासणी करून प्रमाणपत्र घेणे आवश्यक असते. यानंतरच वाढीव राजा मंजूर होते. असे असताना संबंधित ग्रामसेवकास डॉ. डांगे यांनी रजेसाठी नियमबाह्य वैद्यकीय प्रमाणपत्र दिल्याची तक्रार गरुड यांनी केल्यानंतर याबाबत त्यांची चौकशी करण्यासाठी आरोग्य विभागाचे उपसंचालक डॉ. एल. आर. घोडके यांच्या अध्यक्षतेखाली त्रिसदस्यीय समिती गठित करण्यात आल्याची माहिती गरुड यांनी दिली. पदाचा गैरवापर करून डॉ. डांगे यांनी वैद्यकीय प्रमाणपत्र दिले असल्याने त्यांच्यावर निलंबनाची कारवाई करण्याची मागणी तक्रारदार देवराज गरुड यांनी केली आहे.