म. टा. वृत्तसेवा, मालेगाव
मालेगाव-दाभाडी रस्त्यावरील सबस्टेशन जवळ दुचाकी व कंटेनरच्या समोरासमोर झालेल्या अपघातात वयोवृद्ध दुचाकीस्वार जागीच ठार झाले असून, अपघात होताच कंटेनरचालक फरार झाला. रविवारी सकाळी दहा वाजेच्या सुमारास हा अपघात घडला.
येथील कॅम्प भागातील प्रेरणा कॉलनीतील रहिवासी अॅड. मुकुंद राघो भामरे (वय ८१) हे दुचाकीने (एमएच ४१ एएन ४४७३) दाभाडी येथे एका कार्यक्रमासाठी जात होते. यावेळी समोरून भरधाव वेगाने येणाऱ्या कंटेनर (आरजे ०६ जीसी १९१७) चालकाचा ताबा सुटला आणि त्याने दुचाकीला जोरदार धडक दिल्याने भामरे यांचा जागीच मृत्यू झाला. भामरे हे तहसीलदार सुचेता भामरे यांचे वडील होते. या प्रकरणी छावणी पोलिसात गुन्हा दाखल करण्यात आला असून, पुढील तपास पोलिस निरीक्षक इंद्रजीत विश्वकर्मा हे करीत आहेत.