'एक गाव एक गणपती' संकल्पना २२३ गावांत

म. टा. वृत्तसेवा, मनमाड

शहरातील सर्वधर्मीयांमध्ये एकोपा राहावा तसेच जातीय सलोख्याने गावात शांतता नांदावी यासाठी 'एक गाव एक गणपती' ही संकल्पना पोलिस प्रशासन राबवत आहे. त्यासाठी मनमाड उपविभागीय कार्यालयाच्या कक्षेत असलेल्या विविध तालुक्यातील तब्बल २२३ गावात 'एक गाव एक गणपती' संकल्पना प्रत्यक्षात साकारली गेली आहे. या उपक्रमात सहभागी गावांचे पोलिस प्रशासनातर्फे कौतुक होत आहे.

गणेशोत्सवात गावागावात गट तट त्रासदायक ठरत असतात. गावात सलोखा राहावा सर्वांनी मिळून काम करावे यासाठी पोलिस अधीक्षक संजय दराडे यांच्या सूचनेनुसार जिल्ह्यात सर्वत्र 'एक गाव एक गणपती' मोहीम राबवली जात आहे. मनमाड उपविभागीय अधिकारी कार्यालयाच्या कक्षेत असलेल्या मनमाड, नांदगाव, चांदवड, वडनेर भैरव, येवला ग्रामीण

या पोलिस ठाण्याच्या हद्दीत एकूण २२३ ठिकाणी 'एक गाव एक गणपती' बसवण्यात आला आहे, अशी माहिती पोलिस उपअधीक्षक डॉ. राहुल खाडे यांनी दिली.

मंडळे, ग्रामस्थांचे सहकार्य

वरिष्ठांच्या आदेशाचे पालन करताना यासाठी गावागावात बैठका घेऊन ग्रामस्थांना कल्पना समजावून दिली. तसेच यामागचा दृष्टिकोन व महत्त्वही पटवून दिले. गावातील सर्व गणेश मंडळ पदाधिकाऱ्यांची मने या योजनेसाठी तयार करण्यात आल्यानंतरच हे शक्य झाले, असेही डॉ. खाडे म्हणाले.

या अभिनव उपक्रमास पोलिसांना ग्रामस्थांचे मिळालेले मानसिक बळ मोलाचे ठरले आहे. यापुढे शहरातदेखील 'एक गाव एक गणपती' किंवा 'एक वॉर्ड एक गणपती' उपक्रम राबविण्याची गरज आहे. त्या दिशेने पुढील काळात प्रयत्न व्हावे, अशी अपेक्षाही त्यांनी व्यक्त केली.

पोलिस अधीक्षक संजय दराडे यांच्या कल्पनेला कृतीची जोड व सोबतीला त्यांचा सततचा पाठ पुरावा यामुळे हे अभिनव द्विशतक शक्य झाले चांगल्या योजनेला मूर्तरूप देण्याचा सर्वांनी प्रयत्न केला. यामध्ये पोलिस पाटलांचे, अधिकाऱ्यांचे चांगले योगदान लाभले.

डॉ. राहुल खाडे, पोलिस उपअधीक्षक