चांदवडमध्ये कांदा २५०० रुपये क्विंटल

म. टा. वृत्तसेवा, मनमाड

चांदवड येथील बाजार समितीत शुक्रवारी उन्हाळ कांद्याच्या बाजारभावात वाढ झाली असून, २५०० रुपये उच्चांकी भाव कांद्याला मिळाल्याने शेतकरी वर्गात समाधानाचे वातावरण होते. चांदवड बाजार समितीच्या आवारावर कांद्याच्या बाजारभावात वाढ झालेली असून, आवक स्थिर आहे, असे सभापती डॉ. आत्माराम कुंभार्डे यांनी सांगितले.

चांदवड बाजार समितीच्या आवारात शुक्रवारी कांद्याची १२,१०० क्विंटलची आवक होऊन बाजारभाव २५०० रुपयांपर्यंत मिळाले, तसेच सरासरी भाव २०१६० रुपये प्रतिक्विंटल मिळाले आहेत. देशांतर्गत व परदेशात महाराष्ट्रातील कांद्यास मागणी वाढल्याने कांदा बाजारभावात वाढ झालेली आहे. बाजारभावात सुधारणा झालेली असली तरी बाजार समितीच्या आवारावरील शेतमालाची आवक स्थिर आहे.

विक्री झालेल्या सर्व शेतमालाचे वजनमाप करून रक्कम तत्काळ रोख स्वरूपात अदा केली जात असल्याचे सभापती डॉ. कुंभार्डे, उपसभापती नितीन आहेर, सचिव गोरक्षनाथ गांगुर्डे यांनी सांगितले.