मार्केट बंदमुळे कळवणला रास्तारोको

म. टा. वृत्तसेवा, कळवण

कांदा भाव पाडण्याचे धोरण, कांदा व्यापाऱ्यांवर धाडसत्र आणि पर्यायाने मार्केट बंदमुळे शेतकरी संकटात सापडला आहे. या सर्व प्रकारामुळे कांदा पीक वाया जाऊ नये म्हणून मार्केट त्वरित सुरू व्हावे या मागणीसाठी कळवणला भाजप सरकारच्या विरोधात सर्वपक्षीय रास्तारोको आंदोलन करण्यात आले.

शासनाने कांदा निर्यात शुल्कावरील केलेली वाढ व कांद्याच्या भावात घसरण करण्यासाठी होणारे प्रयत्न यामुळे शेतकरी आर्थिक संकटात सापडला आहे. त्यातच कांदा व्यापाऱ्यांवर धाडसत्र सुरू केल्याने मार्केट बंद करण्याचा व्यापाऱ्यांचा निर्णय हा शेतकऱ्यांच्या जीवावर उठणारा आहे. मार्केट बंद राहिल्याने शेतकऱ्यांचा कांदा पडून आहे. पर्यायाने तो सडत आहे. शेतकऱ्यांचा कांदा विकण्यायोग्य राहू नये म्हणून चालवलेला खटाटोप म्हणजे शेतकऱ्यांना देशोधडीला लावण्याचाच प्रकार आहे, अशा शब्दात शेतकरी संघटनेचे उपाध्यक्ष देवीदास पवार यांनी शासनाचा समाचार घेतला.

पवार यांच्या नेतृत्वाखाली तहसीलदार कैलास चावडे यांना निवेदन देण्यात आले. मात्र आंदोलनामुळे कळवण-नाशिक व देवळा रस्त्यावर वाहनांच्या रांगा लागल्या होत्या. तासभर चाललेल्या या आंदोलनात राष्ट्रवादी काँग्रेसच्या प्रदेश उपाध्यक्ष डॉ. भारती पवार, बाजार समितीचे सभापती धनंजय पवार, रवींद्र देवरे, तालुकाध्यक्ष राजेंद्र भामरे, शांताराम जाधव, शिवसेनेचे कारभारी आहेर, स्वाभिमानी संघटनेचे गोविंद पगार, घनःश्याम पवार, विलास रौंदळ, प्रवीण रौंदळ आदींनी निषेध नोंदवला. यावेळी कौतिक पगार, संजय पवार, चंद्रकांत पवार, पोपट पवार, शिवसेनेचे जितेंद्र वाघ, संभाजी पवार, विनोद मालपुरे, किशोर पवार, नाना देवरे, छावा संघटनेचे प्रदीप पगार आदींसह शेतकरी उपस्थित होते.