१४७ जण रडारवर!

कांदा व्यापाऱ्यांचे हवाला कनेक्शन उघडकीस

म. टा. खास प्रतिनिधी, नाशिक

कांदा व्यापाऱ्यांवर टाकलेल्या धाडीनंतर त्यांच्याशी संबं‌‌धित १४७ जण प्राप्तिकर विभागाच्या रडारवर आले आहेत. धाडीत मिळालेल्या कागदपत्रांवरून व्यापाऱ्यांचे दुबई व हवाला कनेक्शन उजेडात आले असून, आज हे प्रकरण प्राप्तिकर विभाग ईडीकडे सोपविणार आहे. दरम्यान, रविवारी व्यापाऱ्यांची बैठक होऊन त्यात आज, सोमवारपासून ‌लिलाव पूर्ववत सुरू करण्याचा निर्णय घेतानाच या धाडसत्राच्या हेतूविषयी शंका व्यक्त करण्यात आली आहे.

जिल्ह्यातील सात व्यापाऱ्यांवर प्राप्तिकर विभागाने २४ ठिकाणी केलेल्या चौकशीत दुबईतून कांदा निर्यातीच्या नावाखाली तीन व्यापाऱ्यांनी फक्त पैसे आणल्याचे आढळून आले आहे. यात कांदे निर्यात झालेच नसल्याचा संशय आहे. कांद्याची साठेबाजी करीत कृत्रिम टंचाई निर्माण केल्यामुळे ही धाड टाकण्यात आली होती. पण, यातून हे नवे प्रकरण समोर आल्यामुळे कांदा व्यापारी

हैराण झाले आहेत. तब्बल तीन दिवस चौकशी केल्यानंतर प्राप्तिकर विभागाच्या अधिकाऱ्यांनी हिशेबाची कागदपत्रेही जप्त केले आहेत. नाशिक जिल्ह्यात कांद्याची मोठी बाजारपेठ असून, देशात व परदेशातही येथून कांदा पुरवठा केला जातो. त्यामुळे कांद्याची साठेबाजी आणि त्यातून होणारी भाववाढ रोखण्यासाठी या धाडी टाकण्यात आल्या. त्यानंतर व्यापाऱ्यांनी तीन दिवस लिलावही बंद पाडले. सोमवारी ते पूर्ववत होणार असले तरी प्राप्तिकर विभागाने याची सखोल चौकशी करण्याचा निर्णय घेतला आहे.

व्याज व्यवहारही उघडकीस

हवाला कनेक्शनबरोबरच बेहिशेबी मालमत्ता व तीन टक्के दराने व्याजाने पैसे देण्याचा प्रकारही समोर आला आहे. तर्तू या प्रकरणात प्राप्तिकर विभागाने गोपनीयता बाळगली असून, त्याबाबत अधिकृत माहिती देण्याचे टाळले आहे.

कांदा निर्यात न करताच दुबईतून हवालामार्फत पैसे आणल्याचे काही पुरावे प्राप्तिकर विभागाच्या हाती लागल्याची चर्चा असली तरी त्यात आमचा काहीच संबंध नाही.

- सोहनलाल भंडारी, जिल्हाध्यक्ष, कांदा व्यापारी असोसिएशन