म. टा. प्रतिनिधी, नाशिक
पुणे येथील सहजयोग ध्यान केंद्राच्या वतीने ऑनलाइन ध्यान शिकण्याची संधी नागरिकांना उपलब्ध करून देण्यात आली आहे. ही कार्यशाळा प्रादेशिक मराठी दुरचित्रवाहिनीवरून प्रसारित केली जाणार आहे. लॉकडाउन दरम्यान हजारो नागरिकांनी विनामूल्य पद्धतीने सहजयोग ध्यान ऑनलाइन शिकून व्यसनमुक्ती, तणावरहित आणि चिंतामुक्त जीवन शैलीचा अनुभव घेतला आहे. नैराश्याशी सामना करण्यासाठी आणि शास्त्रीय पद्धतीने दैनंदिन ध्यान घरबसल्या करता यावे या हेतूने नागरिकांना मदतीचा उपक्रम सहजयोग ध्यानकेंद्र, प्रतिष्ठान पुणेच्या वतीने २३ मार्चपासून राबविला जात आहे. त्यासाठी स्वतंत्र टोल फ्री नंबर कार्यरत आहे. दररोज हजारो नागरिक लाभ घेत आहे. सर्वांच्या फायद्यासाठी टेलीव्हिजनच्या माध्यमातून सहजयोग ध्यान कार्यशाळा भाग १, २, ३ ही १६ ते १८ मे दररोज दुपारी १.३० ते २ वाजता आयोजित केल्या आहेत. शनिवारी (१६ मे) आत्मसाक्षात्कार अनुभव, घरी ध्यान करायची पद्धत, चक्र व नाडी संस्था, रविवारी (१७ मे) आरोग्यदायी कुंडलिनी आणि सहजयोगाचे फायदे, सोमवारी (१८ मे) परमचैतन्याचा वापर आणि सहज जीवनशैली या विषयावर मार्गदर्शन होणार आहे. यासंबंधी अधिक माहितीसाठी १८०० ३० ७०० ८०० या टोल फ्री नंबरवर संपर्क साधावा.