लोगो - मेगाभरती
भविष्य निर्वाह निधी संघटनेत संधी
२ हजार १८९ जागा
म. टा. प्रतिनिधी, नाशिक
कर्मचारी भविष्य निर्वाह निधी संघटनेत २ हजार १८९ जागांसाठी मेगा भरती होत असून, कोणत्याही शाखेतील पदवीधर उमेदवार यास पात्र आहेत. यासाठी ३१ ऑगस्ट व १ सप्टेंबर रोजी पूर्व परीक्षा घेण्यात येणार असून, २१ जुलैपर्यंत अर्ज नोंदणी करता येणार आहे.
कर्मचारी भविष्य निर्वाह निधी संघटनेत होणाऱ्या भरती प्रक्रियेसाठी अर्ज करणाऱ्या उमेदवारांचा ५ हजार शब्द प्रति तास टायपिंग स्पीड असणे आवश्यक आहे. अर्ज नोंदणी करणाऱ्या उमेदवारांची पूर्व परीक्षा घेण्यात येणार असून, या परीक्षेच्या गुणवत्ता यादीनुसार मुख्य परीक्षेसाठी उमेदवारांची निवड करण्यात येईल. संपूर्ण प्रवेश प्रक्रिया पूर्ण झाल्यानंतर नियुक्ती होणाऱ्या उमेदवारांना सातव्या वेतन आयोगाप्रमाणे २५ हजार रुपये प्रति महिना वेतन लागू असेल. अर्ज नोंदणी https://www.epfindia.gov.in/ या वेबसाइटवरून करता येणार असून, उमेदवारांनी अधिकृत माहितीच्या आधारे अर्ज नोंदणी करण्याचे आवाहन संघटनेतर्फे करण्यात आले आहे.
--
परीक्षेचे स्वरुप
पूर्व परीक्षेचे इंग्रजी ३० गुण, बौद्धिक कौशल्य ३५ गुण, अंकगणित ३५ गुण, असे विभाजन असेल. एकूण १०० गुणांची ही परीक्षा होईल. यासाठी १ तास अवधी देण्यात येईल. मुख्य परीक्षेचे बौद्धिक कौशल्य ६० गुण, सामान्य ज्ञान ४० गुण, इंग्रजी ४० गुण, संख्यात्मक कौशल्य ६०, असे स्वरुप असेल. एकूण २०० गुणांची ही परीक्षा असेल, यासाठी २ तासाचा अवधी देण्यात येईल. तसेच मुख्य परीक्षेत दीर्घोत्तरी परीक्षा असेल, या ३० गुणांच्या परीक्षेकरिता ४५ मिनिटांचा अवधी असेल, असे संघटनेतर्फे सांगण्यात आले आहे.
--
स्किल टेस्ट
पूर्व व मुख्य परीक्षेत गुणवत्ता यादीत आलेल्या उमेदवारांची स्किल टेस्ट घेण्यात येणार आहे. कम्प्युटर बेस परीक्षेत उमेदवारांचे कौशल्य तपासण्यात येईल. यानंतर तीनही परीक्षांचे गुण एकत्रित करून, गुणवत्ता यादी जाहीर होईल. यानुसार नियुक्ती संदर्भातील पत्र उमेदवारांना देण्यात येणार आहेत, असे संघटनेतर्फे सांगण्यात आले आहे.