म. टा. प्रतिनिधी, नाशिक
इंडोनेशिया येथे झालेल्या एशियन गेम्समध्ये इराणच्या महिला कबड्डी संघाने भारतीय संघाला हरवून सुवर्णपदक पटकावले. इराणसारख्या नवख्या कबड्डी संघाच्या विजयामागे नाशिकच्या शैलजा जैन यांचा मोलाचा वाटा होता. या संघाच्या त्या प्रशिक्षिका होत्या. इराणच्या संघाला प्रशिक्षण देताना त्यांचा काय अनुभव होता, प्रशिक्षणासाठी त्यांनी कोणत्या तंत्राचा अवलंब केला, यासारख्या अनेक प्रश्नांची उत्तरे जाणून घेण्यासाठी महाराष्ट्र टाइम्सने वाचकांसाठी 'मटा संवाद' या उपक्रमाचे आयोजन केले आहे.
हा 'मटा संवाद' क्रांतिवीर वसंतराव नारायणराव नाइक शिक्षण संस्थेच्या लोकनेते गोपीनाथरावजी अभियांत्रिकी महाविद्यालयातील सेमिनार हॉलमध्ये शुक्रवारी (दि. ७ सप्टेंबर) दुपारी ४ वाजता होणार आहे. या उपक्रमात राज्य सरकारच्या क्रीडा विभागात क्रीडा अधिकारी म्हणून सेवानिवृत्त झालेल्या जैन यांचा इराणपर्यंतचा प्रवास कसा होता, प्रशिक्षण देताना कोणत्या अडचणी आल्या, भारतीय खेळाडू आणि इराणमधील खेळाडू यांच्यात फरक काय, या प्रशिक्षणासाठी इराणच्या कबड्डी फेडरेशनने कसे सहकार्य केले, प्रशिक्षण देताना पारंपरिक पद्धतीबरोबरच नवीन तंत्राचा कसा अवलंब केला, तेथील मुलींचे आत्मबळ वाढावे यासाठी काय केले, प्रशिक्षणाचे शेड्युल्ड कसे होते, विजयासाठी दीड वर्षात सरावाचे कसे प्लॅनिंग केले, भाषेची अडचण दूर करण्यासाठी कुणाचा आधार घेतला, अशा अनेक प्रश्नांची उत्तरे नाशिककरांना मिळणार आहे. जैन या स्वत: कबड्डी खेळाडू असून, आजपर्यंत त्यांनी शालेय, राज्यस्तरीय, विद्यापीठस्तरीय व राष्ट्रीय स्तरावरील कबड्डी सामन्यांमध्ये सहभाग घेतला आहे. पतियाळा येथे झालेल्या नॅशनल गेम्समध्ये निरीक्षक म्हणून त्यांनी कामगिरी बजावली आहे. हैदराबाद, झारखंड येथे आयोजित केलेल्या स्पर्धांमध्येही त्यांची कामगिरी उल्लेखनीय ठरली होती. आजपर्यंत त्यांना राज्य व राष्ट्रीय स्तरावरचे अनेक पुरस्कार मिळाले असून, राज्य सरकारच्या वतीने देण्यात येणारा जिजामाता राज्य क्रीडा पुरस्कारही प्राप्त झाला आहे. जानेवारी २०१७ पासून त्या इराण महिला कबड्डी संघाच्या प्रशिक्षक म्हणून काम पाहत होत्या. नुकत्याच झालेल्या एशियन गेम्स स्पर्धेत इराण महिला कबड्डी संघाला प्रथम क्रमांक मिळाला होता. 'मटा संवाद' या उपक्रमाला वाचकांनी व खेळाडूंनी नेहमीच भरघोस प्रतिसाद दिला आहे. या कार्यक्रमाला जास्तीत जास्त खेळाडूंनी क्रीडा संघटकांनी उपस्थित रहावे.