लढाऊ विमानांच्या देखभाल, दुरुस्तीचा होणार गौरव
Bhavesh.Brahmankar@timesgroup.com
Tweet - @BhaveshBMT
नाशिक : ओझर येथील हवाई दलाच्या केंद्रालाही राष्ट्रपती ध्वज (प्रेसिडेंट कलर) देऊन सन्मानित करण्यात येणार आहे. पुढील वर्षी म्हणजेच २०२०च्या अखेरीस हा सोहळा ओझरला होणार असून यामुळे लढाऊ विमानांच्या देखभाल आणि दुरुस्तीच्या कार्याचा गौरव होणार आहे.
हवाई दलाच्या देखभाल-दुरुस्ती कमांडचे मुख्यालय नागपूर असून त्याअंतर्गत ओझर येथील हवाई दल केंद्र कार्यरत आहे. ओझर हवाई दल केंद्रामध्ये मिग आणि सुखोई विमानांची देखभाल आणि दुरुस्ती केली जाते. तर, काही वर्षांपासून लढाऊ विमानांच्या अपग्रेडेशनचेही काम सुरू झाले आहे. देशातील हे एकमेव केंद्र आहे. हे केंद्र २९ एप्रिल १९७४ मध्ये स्थापन करण्यात आले आहे. या केंद्रात एसयू ७ या विमानांची १९८३ पर्यंत देखभाल व दुरुस्ती करण्यात आली. त्यानंतर १९८३ ते १९८८ या काळात मिग-२१ आणि मिग-२८ विमानांच्या देखभाल व दुरुस्तीची जबाबदारी सोपविण्यात आली. त्यानंतर मिग-२३ विमानांचे काम केंद्राने हाती घेतले. २०१५ पर्यंत या केंद्राने तब्बल २४८ मिग-२३ विमानांची देखभाल व दुरुस्ती केली आहे. १९९६ मध्ये या केंद्राकडे मिग-२९ विमानांच्या देखभाल व दुरुस्तीची जबाबदारी देण्यात आली. या विमानांची केवळ देखभाल व दुरुस्ती न करता त्याचे अपग्रेडेशन करण्याचे कामही केंद्राकडून हाती घेण्यात आले असून ते यशस्वी ठरले आहे. अत्याधुनिक तंत्रज्ञान आणि उपकरणे यांचा वापर त्यासाठी केला जात आहे. त्यामुळेच चौथ्या श्रेणीतील हे विमान ४.५ या श्रेणीत नेण्यामध्ये केंद्राला यश आले आहे. ३० ते ४५ मिनिटे हवेत राहण्याची या विमानाची क्षमता आता दुप्पट झाली आहे. हवेत इंधन भरणे, हवेतून जमिनीवर लक्ष्य भेदणे, विमानाचा दर्शनी भाग, डिजिटल ऑडिओ अशा विविध प्रकारच्या सुधारणा या विमानात करण्यात येत आहेत. या आधुनिकीकरणामुळे मिग-२९ विमान हे सुखोई-३० (एमकेआय) या विमानासारखे बनविण्यात केंद्राला यश आले आहे. या केंद्रामध्ये सुखोई-३० एमकेआय या लढाऊ विमानाचीही देखभाल-दुरुस्ती करण्यात आली आहे. हे विमान हवाई दलाकडे सुपूर्द करण्यात आल्यानंतर आणखी सुखोई विमाने येथे दुरुस्तीसाठी आली आहेत.
नाशिक झळकणार देशपातळीवर
ओझर हवाई दल केंद्राला यापूर्वीच दोन आयएसओ मानांकन मिळाले आहेत. या सर्व बाबींचा विचार राष्ट्रपती ध्वजसाठी करण्यात आला आहे. पुढील वर्षी म्हणजेच डिसेंबर २०२० मध्ये हा सोहळा ओझर हवाई दल केंद्रात होईल, असे हवाई दलातील वरिष्ठ अधिकाऱ्याने सांगितले आहे. यामुळे नाशिकचे नावही देशपातळीवर गौरविले जाणार आहे.