म. टा. प्रतिनिधी, नाशिक
महाराष्ट्र राज्य सरकारी कर्मचारी संघटना व समन्वय समितीने ७, ८ व ९ ऑगस्ट रोजी पुकारलेल्या लाक्षणिक संपात महाराष्ट्र राज्य प्राथमिक शिक्षक समिती सहभागी होणार असल्याची माहिती समितीने दिली आहे. राज्य सरकारी व निमसरकारी व शिक्षक-शिक्षकेत्तर कर्मचारी समन्वय समितीने यापूर्वीही दोन वेळा तीन दिवसीय लाक्षणिक संप पुकारले आहेत. या संपातील मागण्यांच्या पार्श्वभूमीवर सरकारी व्यवस्थेने संघटनेच्या पदाधिकाऱ्यांना चर्चेस निमंत्रित करून आश्वासित केले. परंतु, दिलेल्या आश्वासनांची पूर्ती अद्यापही न केल्याने संपाचे हत्यार उपसत असल्याचे राज्य शिक्षक नेते काळूजी बोरसे यांनी दिली. समितीने विविध मागण्या पूर्ततेच्या प्रतीक्षेत असून, केंद्राप्रमाणे सातवा वेतन आयोग विनाविलंब लागू करावा, अंशदायी पेन्शन रद्द करून जुनी पेन्शन योजना लागू करावी, एमएससीआयटी मुदतवाढी संबंधित स्वयंस्पष्ट आदेश निर्गमित करावा, बदलीतील विस्थापित शिक्षकांना न्याय मिळावा, कमी पटसंख्येच्या शाळा बंद करू नयेत, अशैक्षणिक कामे रद्द करावी, ऑनलाइन कामातून मुक्तता करावी, यांसह विविध मागण्यांसाठी सर्व प्राथमिक शिक्षकांनी संपात सहभागी व्हावे, असे आवाहन सर्व पदाधिकाऱ्यांनी केले आहे.
..
\Bमहाराष्ट्र राज्य खासगी शाळा शिक्षकेतर संघटनाही सहभागी\B
राज्यातील प्राथमिक, माध्यमिक व उच्च माध्यमिक शाळेतील शिक्षकेतरांना त्यांचे सेवा लाभ मिळवून देण्यासाठी प्रयत्नशील असलेली महाराष्ट्र राज्य खासगी शाळा शिक्षकेतर संघटनाही या संपात सहभागी होणार असल्याचे अध्यक्ष सतीश नाडगौडा यांनी सांगितले. संघटनेच्या प्रलंबित मागण्यांकडे सरकारचे लक्ष वेधण्यासाठी राज्यातील सर्व विद्यालयांतील शिक्षकेतर सहकाऱ्यांनी या तीन दिवसीय संपात सहभागी व्हावे, असे आवाहनही त्यांनी केले आहे.