बिटको रुग्णालय ओव्हरफ्लो

ओपीडीत रांगा; आठवडाभरात सुमारे तीन हजार रुग्णांवर उपचार

म. टा. वृत्तसेवा, सिन्नर फाटा

सध्याला तापमानात मोठ्या प्रमाणात चढउतार होत असल्याने संपूर्ण शहराच्या आरोग्यावर दुष्परिणाम झाला असून, महापालिकेचे येथील बिटको रुग्णालय रुग्णांच्या गर्दीने अक्षरशः ओव्हरफ्लो झाले आहे. उपचारासाठी या रुग्णालयाच्या ओपीडीत रुग्णांना अक्षरशः तासनतास रांगेत उभे रहावे लागत असल्याचे चित्र सध्या बिटको रुग्णालयात दिसून येत आहे. विशेष म्हणजे काही रुग्णांची उपचारांसाठी ओपीडीची वेळ संपल्याच्या कारणाने परवड होत आहे. गेल्या आठवडाभरात तब्बल २७७५ रुग्णांनी या रुग्णालयात उपचार घेण्यासाठी हजेरी लावली असल्याचे माहिती समोर येत आहे.

गोरगरिबांसह मध्यमवर्गीय नागरिकांकडून वैद्यकीय उपचारांसाठी बिटको रुग्णालयालाच प्रथम पसंती दिली जाते. गेल्या काही दिवसांपासून शहरातील तापमानात मोठी चढउतार होत असल्याने संपूर्ण शहर तापाने फणफणले असून, खोकल्यासारख्या व्याधींनीही नागरिक त्रस्त झालेले आहेत. शेकडो नागरिक पोटाच्या विकारांनीही हैराण झालेले आहेत. संपूर्ण शहरात साथीच्या आजारांनी थैमान घातल्याने बिटको रुग्णालयात उपचार घेण्यासाठी रुग्णांची गर्दी उसळली आहे. त्यामुळे सर्वच डॉक्टरांच्या ओपीडीपुढे रुग्णांच्या रांगा लागत आहेत.