पवन पवारला कोठडी

सिव्हिलमधून बंदोबस्तात घेतले ताब्यात

म. टा. वृत्तसेवा, सिन्नर फाटा

पोलिसांवर चाकू हल्ला केल्याच्या आरोपाखाली नाशिकरोड पोलिस स्टेशनमध्ये गुन्हा दाखल असलेल्या नगरसेवक पवन पवार याला सोमवारी सायंकाळी नाशिकरोड न्यायालयात हजर केले. न्यायालयाने त्याची २७ ऑक्टोबरपर्यंत तीन दिवसांसाठी पोलिस कोठडीत रवानगी केली.

तळेगाव (अंजनेरी) येथील बालिकेवर अत्याचाराच्या घटनेनंतर जिल्ह्यातील ग्रामीण भागासह नाशिक शहरातही कायदा व सुव्यवस्थेचा प्रश्न निर्माण झाला होता. त्यातच जेलरोड भागात समाजकंटकांनी कायदा हातात घेत वाहनांवर दगडफेक करीत काही वाहनेही जाळली होती. त्या पार्श्वभूमीवर जेलरोडला १२ ऑक्टोबर रोजी पोलिस उपायुक्त श्रीकांत धिवरे यांच्या नेतृत्वाखाली पोलिसांचे संचलन झाले होते. यावेळी शिवाजीनगर येथे जमलेल्या जमावाला पोलिसांनी हटकले असता त्यांनी पोलिसांशी हुज्जत घातली होती. यावेळी नगरसेवक पवन पवार यानेही घटनास्थळी येऊन पोलिस कर्मचाऱ्यावर चाकू हल्ला करून जीवे ठार मारण्याची धमकी दिल्याच्या आरोपाखाली त्याच्याविरोधात नाशिकरोड पोलिसांत गुन्हा दाखल झाला होता. तेव्हापासून नगरसेवक पवन पवार जिल्हा रुग्णालयात दाखल होता.

जेलरोडच्या घटनेपासून नगरसेवक पवन पवार जिल्हा रुग्णालयात भरती झाला होता. जिल्हा रुग्णालयातून डिस्चार्ज मिळण्यापूर्वीपासूनच त्याचा अटकपूर्व जामीन मिळविण्याचा प्रयत्नही सुरू होता. परंतु, त्यात त्याला यश मिळाले नाही. सोमवारी सकाळीच दहा वाजता नाशिकरोड पोलिसांनी त्याला ताब्यात घेतले.

डॉक्टर्स उशिरा

पवन पवारला नाशिकरोड पोलिसांनी सकाळी दहा वाजताच ताब्यात घेतल्याची माहिती सहाय्यक पोलिस निरीक्षक मंगेश मजगर यांनी दिली. परंतु, डॉक्टर्स उशिरा आल्याने अटकेची कायदेशीर प्रक्रिया पूर्ण करण्यास दुपारचे साडेबारा वाजले. सोमवारी नाशिकरोड पोलिसांनी पवन पवार याला नाशिकरोड न्यायालयात हजर केले. यावेळी न्यायालयाने त्यास तीन दिवसांची पोलिस कोठडी सुनावली.

समर्थकांची गर्दी

पवन पवार यास नाशिकरोड कोर्टात हजर केले जाणार असल्याने त्याच्या समर्थकांनी नाशिकरोड कोर्टाच्या आवारात मोठी गर्दी केली होती. पोलिस बंदोबस्तही होता. या गुन्ह्यात पवन पवार याचा भाऊ विशाल चंद्रकांत पवार व राज उदय भालेराव हे दोघेजणही आरोपी आहेत. त्यांना सत्र न्यायालयाने यापूर्वीच तात्पुरता जामीन मंजूर केला होता.