एचएएल संपाबाबत केंद्रीय मंत्र्यांपुढे मांडणार व्यथा
म. टा. वृत्तसेवा, निफाड
वेतन वाढीसाठी एचएएल कामगारांनी बेमुदत संप पुकारला आहे. संपाचा पाचव्या दिवशी शुक्रवारी राष्ट्रवादीचे अध्यक्ष शरद पवार यांनी संपकरी कामगारांची भेट घेतली. कर्मचाऱ्यांच्या समस्या केंद्रीय मंत्र्यांपुढे मांडणार, अशी ग्वाही पवार यांनी दिली.
वेतनकरारवाढी एचएएल कामगार संघटनेने संप पुकारला आहे. शरद पवार, छगन भुजबळ यांनी ओझर येथे संपकरी कामगारांशी शुक्रवारी भेट घेत संवाद साधला. पवार म्हणाले, आजपर्यंत देशाच्या संरक्षणासाठी अहोरात्र काम करणाऱ्या एचएएलच्या कामगारांनी संप करून इतकी टोकाची भूमिका कधी घेतली नव्हती. देशाची संरक्षणात सुखोईने महत्त्वाची भूमिका बजावली आहे. मात्र केंद्र सरकारने फ्रान्सकडून राफेल खरेदी करण्याचा निर्णय घेतला. राफेल चांगले आहे. पण सुखोई त्याहून सरस असल्याचे पवार म्हणाले. ज्यांना कागदी विमान बनवता येत नाही, त्यांना सरकारने विमान बनवण्याचे काम दिले असा टोला पवार यांनी लगावला. देशाची सेवा करणाऱ्या कामगारांना सरकारला न्याय देता आला नाही, केंद्र सरकारने अनुकूल निर्णय न घेतल्यानेच आज उद्योग क्षेत्राची अवस्था दयनीय झाली आहे. यावेळी आमदार बाळासाहेब सानप, माजी आमदार दिलीप बनकर, कामगार नेते रामू जाधव, भानुदास शेळके उपस्थित होते.
...तरीही सुखोई सरसच
चीनसोबत भारताचे युद्ध झाल्यानंतर देशाची संरक्षण व्यवस्था सक्षम करण्यासाठी लढाऊ विमाने तयार करण्यासाठी एचएएल कारखान्याची निर्मिती केली गेली. देशाची संरक्षणाची गरज भागवून मागणीनुसार जगभरात अन्य गोष्टी तयार करून पुरवण्याचे काम देखील तत्कालीन सरकारने केले होते. एचएएलने सुखोईचे यशस्वी निर्मिती केल्यानंतर भारतीय वायुसेनेच्या कामगिरीत सुखोईची भुमिका महत्वाची ठरल्याचे पवार म्हणाले.