दहा लाख रुपयांना फसवणूक
...
म. टा. खास प्रतिनिधी, नाशिक
केवायसी अपडेट आणि फर्निचर खरेदीच्या नावाखाली सायबर चोरट्यांनी वेगवेगळ्या मोबाइलधारकांच्या बँक खात्यातील तब्बल दहा लाखांच्या रोकडवर डल्ला मारला. या प्रकरणी सायबर पोलिस ठाण्यात फसवणुकीचे वेगवेगळे गुन्हे दाखल करण्यात आले आहेत. पेटीएम व गुगल पे अकाउंटची माहिती मिळवित वॉलेटवर क्यू आर कोड स्कॅन करण्यास सांगून बँक खात्यातील रोकड हातोहात लांबविण्यात आली आहे.
प्रकाश दशरथ अहिरे (रा. महात्मानगर) यांनी दिलेल्या तक्रारीनुसार, अहिरे यांच्यासह काही नागरिकांशी १० ऑक्टोबर २०१९ ते २५ फेब्रुवारी २०२० दरम्यान अज्ञात भामट्याने संपर्क साधला. पेटीएम केवायसी करण्याच्या बहाण्याने गुगल प्ले स्टोअरवरून रिसोर्ट, एनी डेस्क, टीम व्ह्युअर आदी प्रकारचे रिमोट अॅक्सेस अॅप डाऊनलोड करण्यास भाग पाडण्यात आले. यानंतर त्यांच्या बँक खात्यातून तब्बल नऊ लाख १९४ रुपये परस्पर ऑनलाइन काढून घेण्यात सायबर चोरटे यशस्वी ठरले.
दुसरी तक्रार किरण रवींद्र चौधरी (रा. तिडके कॉलनी) यांनी दिली. चौधरी यांना फर्निचर विक्री करायचे होते. याबाबत त्यांनी सोशल मीडियावर जाहिरात केली होती. ही जाहिरात बघून चोरट्यांनी गुरुवारी (दि. २७) त्यांच्याशी संपर्क साधला. फर्निचर खरेदीची रोकड पाठविण्याचा बहाणा करून चौधरी यांना पेटीएम व गुगल पे वॉलेटवर क्यू आर कोड स्कॅन करण्यास भाग पाडण्यात आले. क्यू आर कोड स्कॅन होताच त्यांच्या एसबीआय बँक खात्यातील ९६ हजार १०५ रुपयांची रोकड चोरट्यांनी परस्पर काढून घेतली. दोन्ही गुह्यांप्रकरणी सायबर पोलिस ठाण्यात माहिती तंत्रज्ञान अधिनियम कायद्यान्वये गुन्हे दाखल करण्यात आले असून, अधिक तपास वरिष्ठ निरीक्षक बोरसे करीत आहेत.