म. टा. प्रतिनिधी, नाशिक
दारूबंदीबाबत येत्या एप्रिल महिन्यापासून राज्यव्यापी आंदोलन छेडण्याचा निर्णय वारकरी महामंडळाने घेतला आहे. दारूबंदीसाठी जिवाचे रान करणाऱ्या कार्यकर्त्यांना राज्य सरकार संरक्षण देत नसल्याने टाळ-मृदंगांसह रस्त्यावर उतरून राज्य सरकारचा निषेध करण्याचा निर्णय महामंडळाने घेतला आहे. महामंडळाच्या पदाधिकाऱ्यांची बैठक सोमवारी दुपारी नाशिकमधील हुतात्मा स्मारकात झाली. यावेळी अनेक निर्णय घेण्यात आले.
बैठकीला वारकरी महामंडळाचे महासचिव ह. भ. प. प्रभाकर फुलसुंदर, ज्येष्ठ स्वातंत्र्यसैनिक वसंतराव हुदलीकर, महामंडळाचे जिल्हा सचिव पुंडलिकराव थेटे, संत निवृत्तिनाथ महाराज संस्थानचे माजी अध्यक्ष त्र्यंबकराव गायकवाड, डॉ.पी. के. पाटील, बाळासाहेब वीरकर, महामंडळाचे प्रचारप्रमुख राम खुर्दळ, गणेश सोनवणे, सुरेश भोर आदी उपस्थित होते.
जोग महाराज शिक्षण संस्था शताब्दी वर्षानिमित्त २२ ते २९ मार्च या कालावधीत आळंदी येथे हरिनाम सप्ताह होणार आहे. २४ मार्च रोजी नाशिक जिल्ह्यातील वारकरी बांधवांनी आळंदी येथे जाऊन या सप्ताहात सेवा देण्याचा निर्णय या बैठकीमध्ये घेण्यात आला. संत निवृत्तिनाथ देवस्थानने कोणताही निर्णय घेताना वारकरी महामंडळाला विश्वासात घ्यायला हवे, अशी अपेक्षा या बैठकीत व्यक्त करण्यात आली.
राज्यभर दारूबंदी व्हावी यासाठी विविध संघटना त्यांच्या पातळीवर प्रयत्न करतात. परंतु, अजूनही अशा प्रयत्नांना अपेक्षित यश येऊ शकलेले नाही. महाराष्ट्राच्या संत परंपरेतील अनेक संतांनी व्यसनाधिनतेवर त्यांच्या अभंगांमधून कोरडे ओढले आहे. जनजागृतीचे प्रभावी साधन असलेल्या कीर्तन, भारुड, प्रवचन अशा अनेक माध्यमांचा वापर दारूबंदी चळवळीसाठी केला जातो. परंतु, अजूनही सरकारने दारूबंदीचा निर्णय घेतलेला नाही. त्यामुळेच वारकरी या महामंडळाच्या माध्यमातून सरकारविरोधात चळवळ उभारणार आहेत. टाळ-मृदुंग हाती घेऊन धरणे व तत्सम आंदोलनांद्वारे सरकारचा निषेध करण्यात येणार आहे.
ठिकठिकाणी होणार आंदोलन
दारूबंदीसाठी राज्यात अनेक कार्यकर्ते काम करतात. त्यांना सरकारचा ना आधार आहे ना संरक्षण. सरकारची ही भूमिका चुकीची असून, त्याचाही निषेध करण्यासाठी अशा राज्यव्यापी आंदोलनाचे हत्यार उपसण्याचा निर्णय या बैठकीमध्ये घेण्यात आला. एप्रिल महिन्यात नाशिक जिल्ह्यातून या आंदोलनांना सुरुवात केली जाणार आहे. राज्यात ठिकठिकाणी अशी आंदोलने केली जाणार असल्याची माहिती महामंडळाच्या वतीने देण्यात आली.