म. टा. प्रतिनिधी, नाशिक
नाशिक महापालिकेचे स्वतःचे क्रीडा धोरण केवळ कागदावर असल्याने त्याबाबत ओरड झाली होती. त्या पार्श्वभूमीवर महापालिकेच्या बजेटमध्ये क्रीडा विभागासाठी पाच टक्के निधी आरक्षित करण्यात आला आहे. मात्र, हा निधी कधीही खर्च होत नव्हता. यंदा मात्र हा निधी खर्च होण्याच्या आशा बळावल्या आहेत. हा खर्च सहा विभागांमध्ये क्रीडांगणाच्या विकासावर खर्च केला जाणार आहे. या निर्णयाचे खेळाडूंनी स्वागत केले असून, तो कागदावर न राहता त्याची अंमलबजावणी त्वरेने व्हावी अशी आशा व्यक्त केली आहे.
महापालिका क्रीडा क्षेत्राबाबत कायमच उदासीन असते. यामुळेच महापालिकेकडून खेळांचे आयोजन केले जात नाही. महापालिकेत खेळाचे ज्ञान असलेला अधिकारी नसल्याने क्रीडा क्षेत्राविषयी कायमच नाराजीचा सूर असतो. त्याचप्रमाणे क्रीडांगणासाठी आरक्षित भूखंड आहेत. त्या ठिकाणी स्थानिक नगरसेवकांनी अतिक्रमण केले आहे. अशातच क्रीडांगणांच्या आशा मावळल्या होत्या. मात्र, महापालिकेने यंदा १५ कोटी रुपये खर्च करण्याची तयारी दर्शविली आहे. ही क्रीडांगणे तयार करताना तज्ज्ञांचा सल्ला घ्यावा असे मत क्रीडा क्षेत्रातील जाणकारांनी व्यक्त केले आहे. नाशिक महापालिका केवळ वास्तू बांधण्याचा विचार करते. ही वास्तू तयार झाल्यानंतर वापरण्यायोग्य आहे किंवा नाही याचा कोणताही विचार केला जात नाही. सिडको येथे तयार करण्यात आलेले राजे संभाजी स्टेडियम असेच एक आहे. हे स्टेडियम बांधताना खेळाडूंच्या अपेक्षांचा विचार केलेला नाही. त्यामुळे या स्टेडियमकडे फारसे कोणी खेळाडू फिरकत नाहीत.
खेळाडूंच्या अपेक्षा विचारात घ्याव्यात
महापालिकेने खेळाच्या वास्तू तयार करतांना त्या खेळातील जाणकारांचा सल्ला घ्यावा. खेळाडूंची मागणी विचारात घ्यावी. खेळाडू, प्रशिक्षक किवा संघटनात्मक कार्य करणाऱ्या कार्यकर्त्यांची बैठक घेऊन विचार विनीमय केला, असे आजतागायत घडले नाही. पुढेही काही घडेल अशी आशा नाही. अशा प्रकारचा विचार विनीमय झाला तर जनतेचा पैसा सत्कारणी लागेल. त्याचप्रमाणे स्थानिक स्वराज्य संस्थेवर सरकारचा अंकुश असावा. हरित लवादाने महापालिकेवर निर्बंध लादले होते, त्याप्रमाणे क्रीडा क्षेत्राच्या प्रगतीसाठीही निर्बंध लादावेत, तेव्हा महापालिकेला जाग येईल असेही काही क्रीडा संघटनांचे मत आहे.
महापालिकेने घेतलेला निर्णय योग्य आहे. ही मैदाने तयार करताना खेळाडूंच्या संघटनांना विश्वासात घ्यावे. स्थानिक नागरिकांनाही आपल्या निर्णयात सामावून घ्यावे. यामुळे जास्तीत जास्त विद्यार्थी खेळाकडे आकर्षित होतील.
-अविनाश खैरनार, क्रीडा संघटक
कोणताही एक खेळ डोळ्यासमोर ठेवून क्रीडांगणे तयार व्हायला नकोत. क्रीडांगणे तयार करताना सर्व खेळांना पूरक अशी असावीत. यासाठी तांत्रिक समिती गठीत करून त्यांचे मार्गदर्शन घ्यावे. तयार झाल्यानंतर त्याचे चांगले व्यवस्थापन होणे गरजेचे आहे.
- आनंद खरे, क्रीडा मागर्दशक