आदर्शवत शिवजन्मोत्सव सोहळ्याचा निर्धार

म. टा. वृत्तसेवा, पंचवटी

शिवजन्मोत्सव आदर्शवत करण्याच्या दृष्टीने प्रयत्न करण्यात येत असून, त्याचाच एक भाग म्हणून शिवजन्मोत्सवात मद्य पिणार नाही आणि कुणाला पाजणार नाही, अशी शपथच पंचवटी शांतता समितीच्या बैठकीत घेण्यात आली. पंचवटी पोलिस स्टेशनमध्ये बुधवारी झालेल्या बैठकीत वरिष्ठ पोलिस निरीक्षक दिनेश बर्डेकर यांनी शांतता समितीच्या पदाधिकाऱ्यांना ही शपथ घ्यायला लावली.

बर्डेकर म्हणाले, की यावर्षीचा शिवजन्मोत्सव ज्या पद्धतीने साजरा करण्यात येणार आहे, त्यातून चांगला संदेश पोहोचणार आहे. ज्या पद्धतीने नियोजन करण्यात येत आहे, त्यातून खरा इतिहास वाचला जाऊ लागला आहे, याची जाणीव होत आहे.

सचिन पवार म्हणाले, की शिवजन्मोत्सव साजरा करताना कोणत्याही यंत्रणेवर ताण पडणार नाही, कुणालाही त्रास होणार नाही याची दक्षता घेण्यात येणार आहे. देवांग जानी म्हणाले, की यंदाचा शिवजन्मोत्सव साजरा करताना ज्या गोष्टी करण्यात येणार आहेत, त्या केवळ तोंडी न सांगता त्या प्रसिद्ध केल्या आहेत, ही खरोखर गौरवास्पद बाब आहे.

कोणताही उत्सव साजरा करताना त्यात मद्य पिणाऱ्यांची संख्या जास्त असते. आदर्शवत शिवजन्मोत्सव साजरा करताना त्यात दारूला कुठेही थारा दिला जाणार नाही, याची दक्षता पदाधिकाऱ्यांनी आणि कार्यकर्त्यांनी घ्यावी. त्यासाठी कुणीही मद्य पिणार नाही आणि कुणालाही पाजणार नाही, अशी शपथ यावेळी घेण्यात आली. सचिन डोंगरे, नंदूभाऊ पवार, पद्माकर पाटील, माधवी पाटील, किरण पानकर, डॉ. गिरीश मोहिते आदींनी मनोगत व्यक्त केले.

जिल्हाभरात प्रबोधन

शिवजन्मोत्सवात या वर्षापासून वेगळा पायंडा पाडण्यात येणार आहे. त्यासाठी जिल्हाभरात प्रबोधन करण्यात आले असून, शिवजन्मोत्सवासाठी कुणीही कुणाकडेही वर्गणी मागणार नाही. वर्गणीसाठी पावती पुस्तक छापण्यात येणार नाही, तसेच मिरवणुकीत डीजेही लावण्यात येणार नाही. रस्त्यावर स्टेज किंवा मंडप उभारण्यात येणार नूसन, सर्वांना सोबत घेऊन हा जन्मोत्सव साजरा करण्यात येणार आहे, अशी माहिती तुषार जगताप यांनी दिली.