डॉ. रवींद्रकुमार सिंगल यांचे प्रतिपादन
..
म. टा. प्रतिनिधी, नाशिक
प्रत्येकाच्या आयुष्यात अडीअडचणी असतातच, मात्र सकारात्मक विचारांनी कुठलेही चांगले ध्येय गाठण्यासाठी प्रामाणिकपणे प्रयत्न केल्यास हमखास यश मिळते. यशासाठी तंदुरस्त शरीर व एकाग्रचित्त मन यांचा समन्वय आवश्यक आहे, असे प्रतिपादन नाशिकचे पोलिस आयुक्त डॉ. रवींद्रकुमार सिंगल यांनी केले.
फ्रान्समध्ये आयोजित खडतर अशी ट्रायथ्लॉन स्पर्धा यशस्वीपणे पूर्ण करून 'आयर्नमॅन' किताब पटकावल्याबद्दल डॉ. सिंगल यांचा येथील यशवंतराव चव्हाण महाराष्ट्र मुक्त विद्यापीठातर्फे सत्कार करण्यात आला. त्याप्रसंगी ते बोलत होते. विद्यापीठाच्या शैक्षणिक सभागृहात आयोजित या कार्यक्रमाच्या अध्यक्षस्थानी कुलगुरू प्रा. डॉ. ई. वायुनंदन होते.
भाषणाच्या प्रारंभी डॉ. सिंगल यांनी मुक्त विद्यापीठाचा मी विद्यार्थी असून, येथून आपण पत्रकारितेचे शिक्षण घेतले असल्याचे सांगत कृतज्ञता व्यक्त केली. तसेच कुलगुरू प्रा. डॉ. ई. वायुनंदन यांच्या नेतृत्वाखालील अधिक सक्षमतेने हे विद्यापीठ ज्ञानदानाचे कार्य करीत नावलौकिक मिळवत असल्याचे गौरवोद्गार काढले. फ्रान्सच्या विची शहरात आयोजित ट्रायथ्लॉन स्पर्धेची पूर्वतयारी व प्रत्यक्ष स्पर्धेतील सहभाग याविषयीचे अनुभव डॉ. सिंगल यांनी कथन केले. शारीरिक क्षमतेची कसोटी पाहणाऱ्या या स्पर्धेसाठी मनाची एकाग्रता व शरीर आणि मन यांचा समन्वय आवश्यक असल्याचे ते म्हणाले.
कुलगुरू प्रा. डॉ. ई. वायुनंदन यांनी पोलिस खात्यातील ताणतणावाच्या परिस्थितीत नोकरीत असताना बहुआयामी डॉ. सिंगल यांनी बजावलेली ही कामगिरी इतरांना प्रेरणादायी असल्याचे गौरवोद्गार काढले. डॉ. वायुनंदन यांच्या हस्ते पोलिस आयुक्त सिंगल यांचा शाल, स्मृतिचिन्ह व पुष्पगुच्छ देऊन सत्कार करण्यात आला. मनीषा खरे यांनी सूत्रसंचालन केले. विद्यापीठाचे सहाय्यक ग्रंथपाल प्रकाश बर्वे यांनी प्रास्ताविक केले. प्रमोद पवार यांनी परिचय करून दिला. विद्यार्थी सेवा विभागाचे संचालक डॉ. प्रकाश अतकरे यांनी आभार मानले.