प्रगत शिक्षण मोहिमेत फेव्हरमधलेच शिलेदार

jitendra.tarte @timesgroup.com

नाशिक : प्रगत शैक्षणिक महाराष्ट्र अभियानांतर्गत आयोजित विभागीय स्तरावरील परिषदेत उत्तर महाराष्ट्रातील पाचही जिल्ह्यांमधील शिक्षक, मुख्याध्यापक व संबंधित घटकांची उपस्थिती अपेक्षित असताना, निमंत्रणाअभावी विभागातून हजारावर लोक या उपक्रमातून उपेक्षिले गेल्याची बाब पुढे आली आहे.

रावसाहेब थोरात सभागृहात शिक्षण आयुक्त धीरज कुमार यांच्या उपस्थितीत परिषद झाली. अधिकारी वर्गाने फेव्हरमधल्या शिलेदारांवरच या कार्यक्रमाची भिस्त सोडल्याने आयुक्तांच्या तासिकेस विभागातील हजारावर गुरूजी मुकले. प्रगत शैक्षणिक महाराष्ट्राचे उद्दिष्ट्य गाठण्यासाठी या उपक्रमाचे आयोजन केले. महाराष्ट्राला प्रगत बनविण्यासाठी माध्यमिक पेक्षाही मोठी जबाबदारी प्राथमिक ‌शिक्षकांची असताना उत्तर महाराष्ट्रातील पाचही जिल्ह्यातून एकाही प्राथमिक शिक्षक किंवा मुख्याध्यापकास या कार्यशाळेची कल्पनाच देण्यात आली नसल्याचा आरोप प्राथमिक शिक्षकांच्या संघटनांनी केला आहे. प्राथमिक शाळांना वगळून प्रगत शिक्षणाचे उद्दीष्ट कसे गाठले जाईल, असा सवालही या संघटनांनी उपस्थित करत आयोजकांच्या कारभाराविषयी तीव्र नाराजी व्यक्त केली आहे.

पुस्तकाऐवजी बुके कसे?
सत्कार प्रसंगी बुकेऐवजी पुस्तके देण्याच्या सूचना केलेल्या शिक्षण सचिवांनाच बुके भेट देऊन गुरूजींनी त्यांना घरचा आहेर दिला. एकीकडे शिक्षण आयुक्त शैक्षणिक प्रगतीचा आढावा घेताना चिंतनावर भेट देत होते. दुसरीकडे, अधिकाऱ्यांभोवती घुटमळणाऱ्या शिक्षक नेत्यांना त्यांचे गांभीर्य नसल्याने सत्कारांचे फोटो शूट अन् अधिकाऱ्यांसमवेत सेल्फी काढण्यावर त्यांचे लक्ष केंद्रीत होते. जिल्ह्यातील सुमारे ३५० पेक्षा जास्त प्राथमिक शाळांना या उपक्रमापासून दूर ठेवले गेल्याचा आरोप होतो आहे. शिवाय विभागीय स्तरावरील या उपक्रमासाठी विभागातील उपस्थितांची अपेक्षित संख्या सुमारे तीन हजाराच्या घरात असताना अवघ्या हजारावर संख्येचा हॉल बुक करण्यामागचे उद्दीष्ट काय, अशा अनेक मुद्द्यांवर आता प्राथमिक शिक्षकांच्या संघटना चर्चा करू लागल्या आहेत. याशिवाय या उपक्रमास उपस्थित अधिकारी अगोदर परिसरात पर्यटन करून नंतर कार्यशाळेतील चिंतनात सहभागी झाल्याच्या मुद्द्यांवरही हॉलमधील शिक्षकांमध्ये दबक्या आवाजात चर्चा सुरू होती.