म. टा. खास प्रतिनिधी, नाशिक
राष्ट्रपती रामनाथ कोविंद ९ ऑक्टोबरला नाशिकमध्ये मुक्कामी येणार आहेत. देवळाली कॅम्प कॅट्स व आर्टिलरी स्कूलमध्ये होणाऱ्या कार्यक्रमांना ते १० ऑक्टोबर रोजी हजेरी लावणार आहेत. राष्ट्रपती सपत्नीक त्र्यंबकेश्वराच्या दर्शनासाठी जाण्याची शक्यता असून, त्या अनुषंगाने जिल्हा प्रशासनाने तयारी सुरू केली आहे.
राष्ट्रपतींच्या दौऱ्याच्या पार्श्वभूमीवर जिल्हाधिकारी सूरज मांढरे यांनी तयारीचा आढावा घेतला. मध्यवर्ती सभागृहात झालेल्या बैठकीला पोलिस आयुक्त विश्वास नांगरे पाटील, विशेष पोलिस महानिरीक्षक छेरिंग दोरजे, पोलिस अधीक्षक आरती सिंह, निवासी उपजिल्हाधिकारी भागवत डोईफोडे यांसह सैन्य दलासह विविध यंत्रणांचे अधिकारी उपस्थित होते. राष्ट्रपतींच्या उपस्थितीत नव्याने सज्ज झालेल्या बटालियनला झेंडा प्रदान करण्यात येणार आहे. देवळाली कॅम्प येथे गुरुवारी (दि. १०) हा कार्यक्रम होणार असून, ते बुधवारी सायंकाळी नाशिकमध्ये मुक्कामी येणार आहेत. गोल्फ क्लबलगतच्या सरकारी विश्रामगृहावर राष्ट्रपतींचा मुक्काम असणार आहे. राष्ट्रपतींचा अधिकृत दौरा लवकरच प्राप्त होईल, अशी माहिती प्रशासनाने दिली. यापूर्वी राष्ट्रपती प्रतिभा पाटील यांनी नाशिक दौऱ्यावेळी मुक्काम केला होता. गतवर्षी बागलाण तालुक्यातील श्री क्षेत्र मांगीतुंगी येथील विश्व शांती संमेलनासाठी कोविंद जिल्ह्याच्या दौऱ्यावर आले होते.