म. टा. खास प्रतिनिधी, नाशिक
विधानसभेची उमेदवारी जाहीर झाल्यापासून सुरू असलेला नाशिक पूर्व या मतदारसंघातील हाय व्होल्टेज ड्रामा मतदानापर्यंत कायम राहिला असून, राष्ट्रवादीचे उमेदवार आमदार बाळासाहेब सानप यांनी भाजपसह सरकारी यंत्रणेवर गंभीर आरोप केले आहेत. भाजपने माझ्याविरोधात दादागिरी केली असून, माझ्या कार्यकर्त्यांसह वाहनावर दगडफेक केली, तसेच घराबाहेर २५ ते ३० पोलिसांना उभे करून माझ्यावर दबाव टाकण्याचा प्रयत्न केल्याचा आरोप सानप यांनी केला. सरकारी यंत्रणा, तसेच भाजपने कितीही दबाव आणला तरी मतदारराजा सुज्ञ असल्याने विजय आपलाच होईल, असा दावाही त्यांनी केला आहे.
नाशिक पूर्व मतदारसंघातील सानप यांची उमेदवारी भाजपने कापल्यानंतर त्यांनी ऐनवेळी राष्ट्रवादीची उमेदवारी घेऊन भाजपसमोर आव्हान उभे केले. भाजपने अॅड. राहुल ढिकलेंना, तर राष्ट्रवादीने सानप यांना उमेदवारी दिल्याने ही लढत लक्षवेधी बनली आहे. उमेदवारी जाहीर झाल्यापासून या मतदारसंघात हाय व्होल्टेज ड्रामा पाहायला मिळाला होता. पालकमंत्री गिरीश महाजन यांच्यासाठीही ही निवडणूक प्रतिष्ठेची बनली आहे. सानप यांना मतदारांची सहानुभूती मिळत असल्याने भाजपनेही या ठिकाणी ताकद वाढवली होती, तर मतदानाच्या दोन दिवस अगोदर सानप यांच्या कार्यकर्त्यांना नोटिसा काढण्यात आल्या होत्या. सानप यांच्या घराबाहेरही रविवारी पोलिसांना गराडा होता. त्यामुळे सोमवारी माध्यमांशी बोलतांना सानप यांनी, सरकारी यंत्रणेवर दबाव आणून मला त्रास देण्याचा प्रयत्न होत असल्याचा आरोप केला. मी प्रचार करू नये, यासाठी वारंवार हस्तक्षेप करून त्रास देण्यात आला. गेल्या ३० वर्षांत मी अशी निवडणूक पाहिली नाही. आमच्या वाहनांवरही दगडफेक करण्यात आली. भाजपने मला कितीही त्रास दिला तरी मतदार सुज्ञ असून, विजय माझाच होईल, असा दावाही त्यांनी केला आहे.