म. टा. वृत्तसेवा, मालेगाव
मालेगाव शहरासह ग्रामीण भागातील वाढती रुग्णसंख्या आटोक्यात आणण्यासाठी करोना व नॉन करोना या दोन्ही आघाड्यांवर समसमान काम करणे गरजेचे आहे. त्यासाठी मालेगावी नवीन कोविड रुग्णालयाची बांधणी करण्याच्या उद्देशाने त्यासाठी सर्वाधिकार असलेली समिती डॉ. पंकज आशिया यांच्या अध्यक्षतेखाली स्थापन करण्यात आली असून, समितीस आवश्यक ५० लाख रुपयांचा निधी तहसीलदारांकडे वर्ग केल्याची माहिती जिल्हाधिकारी सूरज मांढरे यांनी दिली.
शहरातील अपर जिल्हाधिकारी कार्यालयात शुक्रवारी सायंकाळी सर्व विभागप्रमुखांच्या आढावा बैठकीत ते बोलत होते. पोलिस अधीक्षक डॉ. आरती सिंह, घटना व्यवस्थापक डॉ. पंकज आशिया, महापालिकेचे आयुक्त दीपक कासार, अपर जिल्हाधिकारी धनंजय निकम, जिल्हा परिषदेचे अतिरिक्त मुख्य कार्यकारी अधिकारी रवींद्र शिंदे, अपर पोलिस अधीक्षक संदीप घुगे, जिल्हा शल्यचिकित्सक डॉ. सुरेश जगदाळे, उपविभागीय अधिकारी विजयानंद शर्मा, उपायुक्त नितीन कापडणीस, तहसीलदार चंद्रजीत राजपूत, गटविकास अधिकारी जितेंद्र देवरे यांच्यासह विविध विभागांचे अधिकारी उपस्थित होते.
परिस्थितीचे गांभीर्य ओळखून खासगी डॉक्टरांनीदेखील रुग्णसेवेसाठी पुढे यावे, असे आवाहनही जिल्हाधिकाऱ्यांनी केले. मजुरांना वेतन अदा करण्याचे आदेश असतानाही १०५ तक्रारी प्राप्त झाल्या आहेत. त्या तत्काळ निकाली काढाव्यात, असे निर्देश त्यांनी कामगार उपायुक्तांना दिले. सर्व रुग्णालयांमध्ये मूलभूत सुविधांसह पिण्याचे पाणी व सकस आहाराचा पुरवठा करावा, अशी सूचनाही केली.
स्वॅब तपासणीसाठी ३८ लाख वर्ग
मालेगाव येथील स्वॅब नमुन्यांच्या तपासणीसाठी होत असलेला विलंब दूर करण्याकरिता धुळे येथील वैद्यकीय महाविद्यालयात दिवसाला पाच हजार स्वॅब तपासणीची सुविधा नव्याने सुरू करून घेण्यासाठी नाशिक जिल्ह्यातून ३८ लाख रुपये वर्ग करण्यात आले आहेत. त्यामुळे तपासणी अहवाल प्राप्त होण्यास गती मिळेल, असेही यावेळी अधोरेखित करण्यात आले.