म. टा. खास प्रतिनिधी, नाशिक
बंद फ्लॅटमध्ये पोटच्या मुलीकडून देहविक्री करून घेणाऱ्या दाम्पत्यास पोलिसांनी बेड्या ठोकल्या. पोलिसांनी सिडको परिसरात केलेल्या कारवाईत अल्पवयीन मुलीची सुटका केली आहे. या प्रकरणी अंबड पोलिस ठाण्यात अनैतिक व्यापार प्रतिबंधक अधिनीयम आणि बाल लैंगिक अत्याचार कायदा कलमानुसार गुन्हा दाखल करण्यात आला आहे. ही कारवाई अवैध धंदेविरोधी पथकाने केली.
पोलिसांनी दिलेल्या माहितीनुसार, वावरेनगर भागातील एका सोसायटीत १६ वर्षांच्या अल्पवयीन मुलीच्या माध्यमातून देहविक्री व्यवसाय सुरू असल्याची माहिती पोलिसांच्या अवैध धंदे विरोधी पथकास मिळाली होती. त्यानुसार निरीक्षक कुंदन सोनोने व निर्भयाच्या उपनिरीक्षक गायत्री जाधव आदींच्या संयुक्त पथकाने सोमवारी (दि.२३) बनावट ग्राहक पाठवून छापा मारला. यावेळी संशयित दाम्पत्य आपल्या मुलीकडून बळजबरीने देहविक्री करून घेत असल्याचे समोर आले. घटनास्थळी ९२ हजार ७० रूपये किंमतीचा मुद्देमाल मिळून आला. त्यात १३ हजार ९५० रूपयांची रोकड आणि १६ मोबाइल, अश्लिल चित्रफिती असलेल्या सीडी व गुह्यात वापरण्यात येणारी दुचाकी आदींचा समावेश आहे. पिडीत बालिका संशयित आईची सावत्र मुलगी आहे. मात्र, ही मुलगी नेमकी कोणाची आहे याबाबत पोलिस अधिक तपास करणार आहेत.
पोलिसांनी मुलीची सुटका करीत दाम्पत्यास बेड्या ठोकल्या आहेत. दरम्यान, पिडीत युवतीचे शोषण अनेक दिवसांपासून सुरू असल्याचे समजते. या प्रकरणी अधिक तपास अंबड पोलिस करीत आहेत. या प्रकरणी अंबड पोलिस ठाण्यात गुन्हा दाखल करण्यात आला आहे.