राज ठाकरे आज नाशिक दौऱ्यावर; महापालिका निवडणुकांसाठी मनसे सज्ज

म. टा. खास प्रतिनिधी, नाशिक

महापालिका निवडणुकीच्या तोंडावर सक्रिय झालेल्या मनसे अध्यक्ष राज ठाकरे आणि पुत्र अमित ठाकरे हे आज, बुधवारपासून (दि. २२) दोन दिवस नाशिक दौऱ्यावर येत आहेत. यात राज हे विभागप्रमुख व शाखाध्यक्षांचा मेळावा घेऊन त्यांच्याकडे प्रत्येक प्रभागाची जबाबदारी सोपविणार आहेत.

फेब्रुवारी २०२२ मध्ये नाशिकसह राज्यातील १८ महापालिकांच्या पंचवार्षिक निवडणूक होत आहेत. त्या पार्श्वभूमीवर मुंबई, ठाणे, पुणे पाठोपाठ नाशिकमध्ये राज ठाकरे सक्रिय झाले आहेत. जुलै महिन्यापासून ठाकरे यांनी नाशिक लक्ष केंद्रीत केले आहे. काही वर्षांपूर्वी आपला गड असलेले नाशिक परत मिळवण्यासाठी ठाकरे पितापुत्रांनी आपली शक्ती पणाला लावली आहे. युवा नेते अमित ठाकरे यांच्याकडे नाशिकची जबाबदारी सोपविण्यात आली आहे. अमित ठाकरेंनी नाशिकमधील दौरे वाढविले आहेत. शिवसेनेच्या शाखाप्रमुखाच्या धर्तीवर मनसेने देखील शाखाध्यक्ष निवडीचा निर्णय घेतला आहे. अमित यांच्याकडून या शाखाध्यक्ष निवडीची प्रक्रिया पार पाडली जात आहे. निवडणुकीच्या तोंडावर तीन महिन्यांत राज यांचा तिसरा नाशिक दौरा आहे. त्या पार्श्वभूमीवर ठाकरे यांनी पंधरा दिवसापूर्वी जिल्हाप्रमुख दिलीप दातीर, शहराध्यक्ष अंकुश पवारांसह विभाग प्रमुखांना मुंबईत पाचारण करत, नियोजन आखले.

मेळाव्यातून बिगूल फुंकणार

अमित ठाकरे यांच्यासह मनसेचे वरिष्ठ नेते नितीन सरदेसाई, शिरीष सावंत, संदीप देशपांडे, अविनाश जाधव व योगेश परूळेकर हे मंगळवारी शहरात दाखल झाले. अमित यांच्याकडून १२२ शाखाध्यक्षांची यादी निश्चित केली जाणार आहे. बुधवारी (दि. २२) राज यांच्या उपस्थितीत या शाखाध्यक्षांच्या निवडीवर शिक्कामोर्तब केले जाईल. त्यानंतर गुरुवारी (दि. २३) सहा विभागप्रमुख आणि निवडलेल्या १२२ शाखाध्यक्षांचा एकत्रित मेळावा होणार आहे. त्यात राज ठाकरे मार्गदर्शन करणार आहेत.

पदाधिकाऱ्यांचा एकोप्यातून देखावा

नाशिकमधील मनसेत अंतर्गत वाद धुमसतो आहे. ज्येष्ठ नेत्यांकडून युवा नेत्यांना विश्वासात घेतले जात नसल्याने कुरबुरी सुरू आहेत. यासंदर्भात युवा नेत्यांनी थेट पक्षाध्यक्षांकडे तक्रारी केल्या. त्यानंतर राज ठाकरे यांनी नाशिक दौरा करत कानपिचक्या दिल्या होत्या. अंतर्गत वाद पक्षासाठी घातक ठरू शकतो, त्यामुळे सर्वांनी एकजूट दाखवित नाशिकच्या नवनिर्माणासाठी महापालिकेवर पुन्हा मनसेचा झेंडा फडकविण्याचा मंत्र राज यांनी यापर्वी दिला होता. त्यामुळे राज यांच्या या दौऱ्याच्या पार्श्वभूमीवर नाशिकमधील नेत्यांनी तूर्त तरी एकोपा दाखविण्याचा प्रयत्न केला आहे.