म. टा. प्रतिनिधी, नाशिक
श्री ब्रह्मचैतन्य महाराज सेवा मंडळातर्फे श्री समर्थ ब्रह्मचैतन्य महाराज गोंदवलेकर यांचा जन्मोत्सव सोहळा आयोजित करण्यात आला आहे. या कार्यक्रमाला मंगळवारपासून सुरुवात झाली. ग. दि. माडगूळकर विरचित गीतरामायणातील निवडक गीतांचा 'राम अयोध्यापती' हा कार्यक्रम स्वरप्रभा या समूहातर्फे सादर करण्यात आला.
श्री समर्थ ब्रह्मचैतन्य महाराज गोंदवलेकर यांचा जन्मोत्सव सोहळ्यानिमित्त नामस्मरण, श्रींची पालखी, कीर्तन, भजन, प्रवचन सेवा आदी कार्यक्रमांचे आयोजन करण्यात आले आहे. गीतरामायणातील राम जन्मला गं सखे.., कुशलव रामायण गाती.., ज्येष्ठ तुझा पुत्र मला देई दशरथा.., अशा निवडक गीतांचे सादरीकरण मंगळवारी 'राम अयोध्यापती' या कार्यक्रमातून करण्यात आली. जन्मोत्सवात बुधवारी (दि. ५) सकाळी साडेसहा वाजता श्रींची काकड आरती, आठ वाजता पालखी, सव्वादहा वाजता गीता फाऊंनडेश संकल्पित सामुदायिक स्तोत्रपठण, दुपारी बारा वाजता महाप्रसाद, सायंकाळी साडेसहा वाजता कीर्तन सेवा होणार आहे. तर गुरुवारी (दि. ६) सकाळी नऊ वाजता जन्मोत्सव सोहळा व दहा वाजता कीर्तन सेवा होणार आहे. सायंकाळी साडेचार ते सहा या वेळेत भजनसेवा होणार आहे.