शैक्षणिक साहित्याचे दान देण्यासाठी आवाहन
...
म. टा. प्रतिनिधी, नाशिक
विकासाची संकल्पना शिक्षणाच्या सहभागाशिवाय पूर्ण होऊ शकत नाही. प्रगतीकडे वेगाने झेपावणाऱ्या आपल्या देशातील बहुतांश विद्यार्थी अद्यापही मूलभूत सुविधांपासून वंचित आहेत. हे लक्षात घेऊन गणेशोत्सवानिमित्त 'महाराष्ट्र टाइम्स'ने ही वाचकांच्या माध्यमातून अशा गरजू विद्यार्थ्यांसाठी खारीचा वाटा उचलण्याचा निर्णय घेतला आहे. संवेदनशील नागरिकांकडून गरजू विद्यार्थ्यांसाठी उपलब्ध होणारी शैक्षणिक मदत ही त्यांच्यापर्यंत पोहचविली जाणार आहे.
अनेकदा गरजू विद्यार्थ्यांपर्यंत या प्रकारे मदत पोहचविण्याची मनस्वी इच्छा नागरिकांच्या मनात असते. पण ही मदत कुठे, कशी द्यावी, याबाबत ते अनभिज्ञ असतात. नागरिकांचा हा संभ्रम दूर होऊन गरजूंपर्यंत मदत मिळावी, यासाठी नागरिकांना शैक्षणिक साहित्य 'महाराष्ट्र टाइम्स'कडे सोपविता येणार आहे. सामाजिक क्षेत्रात कार्यरत संस्थांच्या माध्यमातून हे साहित्य योग्य विद्यार्थ्यांपर्यंत पोहचविले जाणार आहे.
दररोजच्या अभ्यासासाठी आवश्यक वही, पेन, चांगले दप्तर असे आवश्यक साहित्य असेल, तर विद्यार्थ्यांचीही शिक्षण घेण्याची इच्छा प्रबळ होते. पण पालकांच्या आर्थिक अडचणींमुळे अनेक विद्यार्थी या साहित्यापासून वंचित राहतात आणि शाळेत जाण्याच्या त्यांच्या इच्छेवरही प्रतिकूल परिणाम होतो. या उपक्रमाच्या माध्यमातून अशा सर्व विद्यार्थ्यांच्या शिक्षणास बळ देण्याचा 'मटा'चा प्रयत्न असणार आहे. यासाठी नागरिकांना स्वेच्छेने या विद्यार्थ्यांना शैक्षणिक साहित्याच्या माध्यमातून मदतीचा हात देता येणार आहे.
...
...येथे होईल साहित्याचे संकलन
'महाराष्ट्र टाइम्स'च्या अल्फा स्क्वेअर, डिसूझा कॉलनी, नाशिक या पत्त्यावर शैक्षणिक साहित्य पाठवता येणार आहे. या गणेशोत्सवानिमित्त गरजूंच्या शिक्षणाला बळ देण्याची संधीही नागरिकांना मिळणार आहे. जास्तीत जास्त नागरिकांनी या उपक्रमात सहभाग घ्यावा.