मतदारसंघातील कार्यकर्तेच घेताहेत सभा
म. टा. वृत्तसेवा, घोटी
निवडणुका म्हंटल्या की सर्वत्र प्रचाराचा गाजावाजा असतो. प्रचाराची रणधूमाळी असते. देशातील, राज्यातील नामांकित नेत्यांची भाषणे होतात. आरोप-प्रत्यारोपाच्या फेरी झडतात. राज्यभर निवडणुकीत प्रचाराची राळ उठली असताना जिल्ह्यातील इगतपुरी-त्र्यंबकेश्वर या आदिवासी राखीव मतदार संघात निवडणुकीचा प्रचार मात्र सुनासुना दिसतो. मतदार संघात प्रचारकांची वानवा असल्याचे चित्र असून, स्थानिक पदाधिकाऱ्यांनाच स्टार प्रचारकांची भूमिका बजवावी लागत आहे.
इगतपुरी मतदार संघात प्रचाराची सुरुवात वगळता युती वा आघाडीकडून इगतपुरी, घोटी, त्र्यंबक, हरसूल, वाडीवऱ्हे आदी भागासह ग्रामीण भागात प्रचाराच्या निमित्ताने फारशा प्रचारसभा होताना दिसत नाही. प्रचाराच्या पहिल्या टप्प्यात शिवसेनेकडून प्रचाराचा शुभारंभ शिवसेना नेते आदित्य ठाकरे व खासदार संजय राऊत यांच्या प्रचारसभेने झाला. काँग्रेस-राष्ट्रवादी आघाडीची प्रचाराची सुरुवात माजी उपमुख्यमंत्री छगन भुजबळ यांच्या प्रचारसभेने झाली. या सभा वगळता अन्य कोठेही आणि कोणाच्याही सभा व प्रचार सभा झाल्या नाहीत.
जिल्ह्यातील इतर मतदारसंघात प्रचाराची मोठी रणधूमाळी सुरू आहे. राजकीय नेते, अभिनेते यांच्या सभांचे नियोजन आहे. मात्र इगतपुरी मतदात संघात महायुती, महाआघाडीकडून मोठ्या प्रचार सभांचे नियोजन नसल्याने कार्यकर्तेच सभांना संबोधित करीत आहेत. इगतपुरी शहरात तर बहुजन विकास आघाडीचे कार्यालय वगळता मोठ्या उमेदवारांचे कार्यालये देखील नाही.
सकाळे, घोडेंकडेच सूत्र
महाआघाडीकडून जि. प. चे माजी उपाध्यक्ष संपत सकाळे, माजी जि. प. सदस्य गोरख बोडके, जिल्हा बँक संचालक संदीप गुळवे, उदय जाधव, जनार्धन माळी, भास्कर गुंजाळ हे तर , महायुतीकडून प्रा. मनोहर घोडे, शिवसेना उपजिल्हाप्रमुख निवृत्ती जाधव, संपत काळे, रघुनाथ तोकडे, नंदलाल भागडे, कचरू डुकरे आदी स्टार प्रचारकांची भूमिका बजावत आहे.
चौघांमध्ये चुरस
महायुतीच्या उमेदवार निर्मला गावित व महाआघाडीचे उमेदवार हिरामण खोसकर यांच्यात मोठी चुरस निर्माण झाली असून, उमेदवारांबरोबरच त्यांचे समर्थक नेते व कार्यकर्ते यांनीही प्रचारात आघाडी घेतली आहे. दरम्यान उमेदवारांनी इगतपुरी तालुक्याकडे विशेष लक्ष केंद्रीत केले आहे. संपूर्ण तालुका पिंजून काढताना उमेदवार व त्यांच्या समर्थकांची दमछाक होत आहे. हिरामण खोसकर यांनी इगतपुरी तालुक्यातील घोटी, नांदगाव सदो, वाडीवऱ्हे, शिरसाठे गटात प्रचारदौरा केला. घोटी शहरात पदयात्रा काढून मतदारांच्या भेटी घेतल्या. निर्मला गावित यांनीही गेले तीन दिवस इगतपुरी तालुक्यात ग्रामीण भागात प्रचार दौरा करून ठिकठिकाणी मतदारांच्या गाठीभेटी घेतल्या. मनसेचे योगेश शेवरे यांनीही दोन दिवसांपूर्वी प्रचारात तालुका पिंजून काढला. वंचित बहुजन आघाडीचे उमेदवार लकी जाधव यांचीही तालुक्यात प्रचाराची फेरी पूर्ण झाली.