दहा हजाराचा टप्पा ओलांडला; उन्हाळ कांद्याची आवक घटली
म. टा. वृत्तसेवा, निफाड
उन्हाळ कांदा आता जवळपास संपत आला आहे. मात्र अखेरच्या टप्प्यांत उन्हाळ कांदा तेरा हजार रुपये क्विंटलपर्यंत पोहोचलेला असताना बाजारात नव्याने आलेल्या लाल कांद्यानेही दहा हजाराचा टप्पा गाठला आहे. पिंपळगाव कृषी उत्पन्न बाजार समितीमध्ये लाल कांद्याला दहा हजार रुपये क्विंटल असा भाव मिळाला. लाल कांद्याने हा टप्पा गाठण्याची ही आजपर्यंतची पहिलीच वेळ आहे.
पिंपळगाव बाजार समितीत उन्हाळ कांद्याची आवक अवघी १३ वाहने होती. यात कमीत कमी ४६००, जास्तीत जास्त १४ हजार आणि सरासरी १२ हजार ६०० रुपये असा दर मिळाला होता. तर लाल कांद्याची ३४२ वाहनातून आवक झाली होती. त्याला कमीत कमी साडे आठ हजार, जास्तीत जास्त दहा हजार ६००, सरासरी आठ हजार ५०० रु प्रति क्विंटल भाव असा होता. लासलगाव बाजार समितीत लाल कांद्याची ३२७४ क्विंटल इतकी आवक होती. त्याला कमीत कमी अडीच हजार, जास्तीत जास्त दहा हजार, सरासरी साडेसात हजार रुपये असा दर मिळाला.
कारमधून आणले कांदे
उन्हाळ कांदा जवळपास संपला आहे. पण ज्यांच्याकडे ५० ते १०० किलो कांदा असला तरी तो बाजारात आणला जात आहे. गुरुवारी पिंपळगाव बाजार समितीत बेहेड येथील विनोद भवर या शेतकऱ्याने मारुती कारमध्ये कॅरेटद्वारे लिलावसाठी कांदे आणले होते. गेल्या आठवड्यात येवल्यातही एका शेतकऱ्याने फॉर्च्यूनरमधून कांदा आणला होता.
आवकेत मोठी तफावत
आज लाल कांद्याने दहा हजार रुपये क्विंटलचा टप्पा गाठला आहे. पावसाने नुकसान झाल्याने उत्पादन कमी आले आहे. त्यामुळे कांद्याची आवक अगदी एक हजार क्विंटलच्या दरम्यान आली आहे. गेल्या वर्षी डिसेंबर महिन्यात लाल कांद्याची आवक २५ हजार रुपये क्विंटलपर्यंत होती. ती आज पाच हजार क्विंटलपर्यंत आली आहे. तब्बल २० हजार क्विंटलची तूट आजच्या घडीला मागील वर्षीच्या तुलनेत आहे. ही घट फक्त एकट्या पिंपळगाव बाजार समितीची आहे. नाशिक जिल्हा कांदा उत्पादनाचे आगार आहे. यावरून जिल्ह्यात अवकाळी पावसाने कांद्याचे किती मोठे नुकसान केल्याचा अंदाज येतो.