म. टा. प्रतिनिधी, नाशिक
राज्य सरकारने महाराष्ट्र दुकाने व आस्थापना (नोकरीचे व सेवाशर्तीचे विनियमन) अधिनियम २०१७ हा नवीन अधिनियम लागू केला आहे. त्यानुसार नवीन दुकानांना नोंदणी करणे बंधनकारक करण्यात आले आहे.
राज्यातील ग्रामीण व शहरी भागातल्या सर्व दुकाने, हॉटेल, लॉजिंग, विविध प्रकारच्या आस्थापनांनी १० पेक्षा जास्त कामगार असल्यास या अधिनियमांतर्गत क्षेत्रीय सुविधाकार (पूर्वीचे दुकान निरीक्षक) यांच्ययाकडे सूचनापत्रासाठी ऑनलाइन अर्ज करून त्याची पावती घेणे बंधनकारक आहे. सर्व संबंधितांनी विहीत मुदतीत नोंदणी करून सूचनापत्र घ्यावे, असे आवाहन कामगार उपायुक्त गुलाब दाभाडे यांनी केले आहे. ऑनलाइन अर्ज करण्यासाठी LMS.mhaonline.gov.in या वेबसाइटवरील प्रणालीचा वापर करावा. या नवीन अधिनियमामुळे डिसेंबर २०१७ पासून यापूर्वीचा महाराष्ट्र दुकाने व आस्थापना अधिनियम १९४८ हा निरसित झाला आहे. नवीन अधिनियमांतर्गत संबंधितांनी विहीत मुदतीत अचूक माहिती भरून नोंदणी करावी; अन्यथा संबंधित आस्थापनांवर कारवाई करण्यात येईल, असे कळविले आहे.