पोलिसांच्या तावडीतून पळालेला सराईत सापडला
म. टा. खास प्रतिनिधी, नाशिक
दरोडा, जबरी चोरी व घरफोडी सारखे गंभीर गुन्हे करण्याच्या तयारीत असलेल्या चौघांच्या टोळीला ग्रामीण पोलिसांच्या स्थानिक गुन्हे शाखेच्या तसेच कळवण पोलिस ठाण्याच्या संयुक्त पथकाने अटक केली. यात निफाड पोलिसांच्या ताब्यातून पाच महिन्यांपूर्वी पळून गेलेला सराईत गुन्हेगार सुद्धा पोलिसांच्या हाती लागला.
श्रावण सुरेश पिंपळे (वय २०, रा. नैताळे, निफाड), सोहेल उर्फ सोहेब अन्सार मनियार (वय १९, एचबी कॉलनी, सातपूर), गणेश शंकर पिंपळे (वय २१, ता. गंगापूर, जि. औरंगाबाद) आणि किरण शिवपांडू आहिरे (वय २७, रा. चितळी, ता. श्रीरामपूर, जि. अहमदनगर) अशी संशयित आरोपींची नावे आहेत. यांचा आणखी एक साथिदार गणेश तेलोरे (रा. गणेशनगर, जिल्हा अहमदनगर) हा फरार असून, चौघे संशयित कळवण नांदुरी रोडवर दरोडा टाकण्याच्या तयारीत असताना पोलिसांनी त्यांना पकडले. संशयितांच्या ताब्यातून एक कार, पिस्तूल, काडतूस, चॉपर, टॉमी, कटवणी, दोन मोबाइल, १४ हजार रुपयांची रोकड असा मुद्देमाल जप्त करण्यात आला. जप्त करण्यात आलेली कार राहता तालुक्यातील अस्तगाव येथून जबरीने चोरून आणल्याचे पोलिस तपासात निष्पन्न झाले आहे. ही टोळी सराईत असून, आरोपींविरूद्ध अहमदनगर, औरंगाबाद तसेच नाशिक जिल्ह्यात दरोडा, जबरी चोरी, घरफोडी असे अनेक गंभीर गुन्हे दाखल आहेत. या टोळीने दिलेल्या कबुलीनुसार, कोपरगाव, राहता, निफाड व येवला शहर पोलिस ठाण्यातील घरफोडीचे तीन, जबरी चोरीचे दोन, तर दुचाकी चोरीचा एक असे सहा गुन्हे उघडकीस आले आहेत. संशयितांना कळवण पोलिसांच्या ताब्यात देण्यात आले.
ही कारवाई पोलिस अधीक्षक डॉ. आरतीसिंह, अपर पोलिस अधीक्षक शर्मिष्ठा वालावलकर यांच्या मार्गदर्शनाखाली एलसीबीचे निरीक्षक के. के. पाटील, कळवण पोलिस ठाण्याचे निरीक्षक प्रमोद वाघ, एलसीबीचे एएसआय रवींद्र शिलावट, हवालदार दीपक आहिरे, पुंडलीक राऊत, दत्तात्रय साबळे, पोलिस नाईक अमोल घुगे, प्रवीण सानप, राजू सांगळे, कॉन्स्टेबल विश्वनाथ काकड, प्रदीप बहिरम, हेमंत गिलबिले, संदीप लगड, गौरव पगारे, चालक कॉन्स्टेबल योगेश गुमलाडू, कळवण पोलिस ठाण्याचे एएसआय खाडे, हवालदार मधूकर तारू, पोलिस नाईक शिवा शिंदे आदींच्या पथकाने केली.
फरार श्रावण पिंपळे अखेर अटकेत
टोळीचा म्होरक्या श्रावण पिंपळे पाच महिन्यांपूर्वी निफाड पोलिसांच्या ताब्यातून फरार झाला होता. केसच्या सुनावणीसाठी निफाड कोर्टात आणलेला पिंपळे कोर्टाच्या आवरातूनच पोलिसाच्या हाताला झटका देऊन फरार झाला होता. मागील पाच महिन्यांपासून पोलिस त्याचा शोध घेत होते. तो अहमदनगरसह अन्य काही ठिकाणी लपला होता. दरम्यान, २०१६ मध्ये अहमदनगरमधील तोफखाना पोलिस ठाण्याच्या लॉकअपमधून पिंपळे फरार झाला होता.