नाशिकरोडला भरदिवसा घरफोडी

भरदुपारी चोरट्यांनी घरफोडी करून तब्बल दोन लाखांचे सोन्याचे दागिने लंपास केले. ही घटना शुक्रवारी (२ जून) नाशिकरोडच्या गंधर्वनगरी परिसरात घडली.

गंगाराम ईश्वरदास पटेल (रा. गंधर्वनगरी) यांच्या तक्रारीनुसार, शुक्रवारी सकाळी आठ ते रात्री पावणेबारापर्यंत पटेल कामानिमित्ताने बाहेर गेले होते. या दरम्यान त्यांच्या फ्लॅटला कुलूप होते. चोरट्यांनी लोखंडी कपाटातील दोन लाखांचे सोन्याचे दागिने लंपास केले. या प्रकरणी उपनगर पोलिस स्टेशनमध्ये गुन्हा दाखल करण्यात आला आहे.

डीजे चालकावर गुन्हा

शिवाजीनगर परिसरात रात्री उशिरापर्यंत डीजे वाजवत ध्वनिमर्यादेचे उल्लंघन करणाऱ्या डीजे चालकावर गुन्हा दाखल करण्यात आला. संबंधितांकडून २५ हजार रुपयांचे साहित्य गंगापूर पोलिसांनी जप्त केले. शिवाजीनगरच्या सप्तशृंगी मंदिराजवळ सुरू असलेल्या कार्यक्रमासाठी डीजे वाजवण्याचे काम सुरू होते. ताहाराबाद (ता. सटाणा) येथील संशयित एकनाथ भागाजी धिवरे (वय ३१) याचा स्टार म्युझिकल डीजे व बँजो पार्टीला यासाठी पाचारण करण्यात आले होते. ध्वनिमर्यादेचेही उल्लंघन झाल्याने गंगापूर पोलिसांनी कारवाई करीत संशयित धिवरे याला अटक केली. त्याच्याकडून एनएक्स ऑडिओ कंपनीचे ऑडिओ मिक्सर जप्त करण्यात आले. संशयित धिवरे याला जामिनावर मुक्त करण्यात आले आहे.

क्रेडिट कार्डद्वारे चोरी

संभाजी स्टेडियममध्ये फिरण्यासाठी गेलेल्या व्यक्तीच्या हरवलेल्या पाकिटातील क्रेडिट कार्डाच्या माध्यमातून दिल्ली येथील संशयिताने तब्बल ८५ हजार रुपये परस्पर लंपा, केल्याचा प्रकार समोर आला आहे. या प्रकरणी सोपानदेव काशिनाथ सोनार (रा. उपेंद्रनगर, सिडको) यांनी अंबड पोलिस स्टेशनला तक्रार दिली आहे. २० एप्रिल रोजी सोनार सिडकोतील संभाजी स्टेडियममध्ये फिरण्यासाठी गेले होते. त्या वेळी त्यांच्या खिशातील पाकीट पडले. त्याच दिवशी सायंकाळी सोनार यांच्या मोबाइलवर संशयित आशिष कक्कर (रा. विकास विहार, दिल्ली) याने फोन करून संपर्क साधला. त्याने कार्डाबाबत सोनार यांच्याकडून सर्व माहिती घेत ८५ हजार रुपये काढून घेतले. फसवणूक झाल्याचे समजल्यानंतर सोनार यांनी अंबड पोलिस स्टेशन गाठले.

सातपूरमध्ये अवैध दारू दुकानावर कारवाई

नव्यानेच नियुक्त झालेले पोलिस उपायुक्त श्रीकृष्ण कोकाटे यांनी सातपूर एमआयडीसीतील एका अवैध दारू दुकानाचे शेड जमीनदोस्त केले आहे. त्यामुळे अवैध धंदे करणाऱ्यांना चपराक बसली असून, या कारवाईनंतर सातपूर भागातील सर्वच अवैध धंदे बंद ठेवण्यात आले होते. मात्र, एकाच ठिकाणी कारवाई का, असा प्रश्न या वेळी उपस्थित होत आहे.

सातपूरच्या अशोकनगर भागात महिंद्रा मटेरिय गेटसमोर असलेल्या गुन्हेगारी व्यक्तीचे अवैध देशी दारूचे दुकान आजही सर्रासपणे सुरू आहे. मात्र, गुन्हे शाखेने एका क्लबवर यापूर्वी कारवाई केली होती. मात्र, अवैध देशी दारूच्या दुकानावरील कारवाई टाळली होती. आता पुन्हा अवैध मद्य विक्रीच्या दुकानावर कारवाई केली असताना महिंद्रा मटेरिय गेटसमोरील दुकानावर कारवाई केलेली नाही. पोलिसांनी सरसकट सर्वच अवैद्य धंदे बंद करावेत, अशी मागणी केली जात आहे.