म. टा. प्रतिनिधी, नाशिक
रोटरी क्लब ऑफ नाशिकच्या वतीने आरोग्य मंथन या कार्यक्रमात शुक्रवारी (दि. १३) सायंकाळी सहा वाजता गंगापूर रोडवरील शंकराचार्य न्यास सभागृह येथे 'हृदय विकार आणि उपचार' कार्यक्रमाचे आयोजन करण्यात आले आहे. यात हृदयरोगतज्ज्ञ डॉ. साकेत जुनागढे, डॉ. मनोज चोपडा, डॉ. अनिरुद्ध धर्माधिकारी आणि हृदयशल्य चिकित्सक डॉ. अभय वालीया व डॉ.राहुल कैचे सहभागी होणार आहेत. या तज्ज्ञांची मुलाखत डॉ. मृदुला बेळे या घेणार आहेत.
जे हृदय आपल्याला आपल्या जन्माच्या क्षणापासून मरणाच्या क्षणापर्यंत साथ देते, हृदय उत्तम, तर आपण निरोगी, त्यासाठी काय आहार असावा, काय व्यायाम करावा, जर हृदय विकार असल्यास तो सर्वात प्रथम कसा ओळखावा, झाल्यास काय उपाययोजना आहेत, हृदय विकार टाळण्यासाठी काय करावे आणि गरज पडल्यास हृदय उघडून शस्त्रक्रिया कशा प्रकारे असतात, अशा अनेक प्रश्नांची उत्तरे या कार्यक्रमातून मिळणार आहेत.
रोटरी क्लब ऑफ नाशिक अध्यक्ष मनीष चिंधडे, चिटणीस डॉ. श्रीया कुलकर्णी आणि क्लबचे मेडिकल डायरेक्टर डॉ. राजेंद्र नेहेते यांच्या पुढाकाराने या कार्यक्रमाचे आयोजन केले आहे.