म. टा. खास प्रतिनिधी, नाशिक
चालकांमध्ये वाहतूक नियमांबाबत, अपघातांच्या तीव्रतेबाबत जनजागृती करण्यासाठी शहरातील १४ सिग्नलवर आता 'यमराज' अवतरणार आहेत.
आज, रविवार (दि. १ मार्च)पासून हा उपक्रम राबविण्यात येणार असून, या कार्यक्रमाचे उद्घाटन पोलिस आयुक्तालयात शनिवारी आयुक्त विश्वास नांगरे-पाटील यांच्या हस्ते करण्यात झाले. शहरातील वाहतुकीला शिस्त लागावी यासाठी वाहतूक पोलिस बेशिस्त वाहनचालकांकडून दंड वसूल करतात. मात्र, तरीही असंख्य वाहनचालक सर्रासपणे नियम पायदळी तुडवतात. बेशिस्त वाहनचालकांमुळे सातत्याने जीवघेणे अपघात होतात. वाहनचालकांना नियम पाळण्याचे गांभीर्य समजावून सांगण्यासाठी आता थेट 'यमराज'च अवतरणार असून, त्यासाठी बारा स्वयंसेवकांची मदत घेण्यात येत आहे. वाहतूक जनजागृतीचे खासगी एफ. एम.द्वारे थेट प्रक्षेपण केले जाणार आहे. शहर वाहतूक शाखा, खासगी बँक आणि खासगी एफएम चॅनल यांच्या संयुक्त विद्यमाने दि. १ ते ७ मार्च या कालावधीत सदर मोहीम राबविण्यात येणार आहे. रस्ता सुरक्षेच्या अनुषंगाने शहरातील १४ सिग्नलवर वाहतूक नियमांबाबत जनजागृती केली जाणार आहे. त्यामुळे वाहनचालकांनी सिग्नल न तोडणे, हेल्मेटचा वापर, सीट बेल्टचा वापर, झेब्रा क्रॉसिंग, वाहनाचा वेग यांसह रस्ता सुरक्षेचे सर्व नियम पाळावेत, असे आवाहन नांगरे पाटील यांनी केले. उद्घाटन कार्यक्रमास उपायुक्त लक्ष्मीकांत पाटील, सहायक आयुक्त मंगलसिंग सूर्यवंशी, एचडीएफसी बँकेचे सर्कल हेड प्रेमजीत कोनवर, राहुल देशपांडे, सचिन भास्कर, अंतरा आगते आदी उपस्थित होते.