म. टा. खास प्रतिनिधी, नाशिक
म. टा. वृत्तसेवा, धुळे नंदुरबार येथील राज्यपालांच्या दौऱ्याचा बंदोबस्त आटोपून गुरुवारी (दि. २०) मध्यरात्री दीड वाजेच्या सुमारास नंदुरबार मुख्यालयाकडे परतणाऱ्या नाशिक ग्रामीण पोलिसांच्या वाहनास अपघात झाला. यात दहा जण जखमी झाले. त्यांच्यावर उपचार सुरू असून, अपघाताची घटना तळोदा-नंदुरबार मार्गावर पथराई गावाजवळ झाला. राज्यपाल भगतसिंग कोश्यारी गुरुवारी नंदुरबार जिल्ह्याच्या दौऱ्यावर होते. राज्यपालांच्या दौऱ्याच्या बंदोबस्तासाठी नाशिक ग्रामीणसह विभागातील पोलिस तैनात करण्यात आले होते. भगदरी (ता. अक्कलकुवा) या दत्तक गावी भेट देऊन राज्यपाल कोश्यारी रवाना झाल्यानंतर नाशिक ग्रामीणचे पोलिस बंदोबस्त आटोपून नंदूरबार येथील जिल्हा अधीक्षक कार्यालयात जाण्यासाठी प्रवासास लागले. नंदुरबार नजीकच्या पथराई गावाजवळ चालकाचे आपल्या वाहनावरील नियंत्रण सुटल्याने हा अपघात झाला. तळोदा-नंदुरबार मार्गावर अन्य वाहनांना वाचविण्याच्या प्रयत्नात चालकाने प्रसंगावधान राखत आपले वाहन रस्त्याच्या खाली उतरविल्याने मोठा अनर्थ टळला.